loginkerala
ഐപിഎൽ 2027 സീസണിന് മുന്നോടിയായി വമ്പൻ താരക്കൈമാറ്റം; ക്യാപ്റ്റൻസി പ്രഖ്യാപനം പിന്നീട്
മുംബൈ: ഐപിഎൽ 2027 സീസണിന് മുന്നോടിയായി വമ്പൻ താരക്കൈമാറ്റവുമായി മുംബൈ ഇന്ത്യൻസ്. ഇന്ത്യൻ ഓൾറൗണ്ടർ ഹാർദിക് പാണ്ഡ്യ പഞ്ചാബ് കിങ്സിലേക്ക് മാറുമ്പോൾ പേസ് ബൗളർ അർഷ്ദീപ് സിങ് മുംബൈ ഇന്ത്യൻസിലെത്തും. നവംബർ 11ന് മുംബൈ ഇന്ത്യൻസ് ഔദ്യോഗികമായി ഇക്കാര്യം പ്രഖ്യാപിച്ചു.
ഹാർദിക് പാണ്ഡ്യയുടെ സംഭാവനകളെ അഭിനന്ദിച്ച മുംബൈ ഇന്ത്യൻസ് ഉടമ ആകാശ് അംബാനി, അദ്ദേഹത്തിന് എല്ലാ ആശംസകളും നേർന്നു. 2015ൽ യുവതാരമായി മുംബൈയിലെത്തിയ ഹാർദിക് പിന്നീട് ലോകത്തിലെ മികച്ച ഓൾറൗണ്ടർമാരിൽ ഒരാളായി വളർന്നു. മുംബൈ ഇന്ത്യൻസിനൊപ്പം നാല് ഐപിഎൽ കിരീടനേട്ടങ്ങളിൽ നിർണായക പങ്കുവഹിച്ച താരം 2024ൽ ടീമിന്റെ നായകനായും തിരിച്ചെത്തിയിരുന്നു.
ഹാർദിക്കിന്റെ മികവും മത്സരവീര്യവും ടീമിന് നൽകിയ സംഭാവനകളും വിലപ്പെട്ടതാണെന്ന് ആകാശ് അംബാനി പറഞ്ഞു. കരിയറിലെ പുതിയ അധ്യായത്തിന് എല്ലാ വിജയങ്ങളും ആശംസിക്കുന്നതായും അദ്ദേഹം വ്യക്തമാക്കി.
അതേസമയം, അർഷ്ദീപ് സിങ്ങിന്റെ വരവ് ടീമിന്റെ ബൗളിങ് നിരയ്ക്ക് കൂടുതൽ കരുത്തും വൈവിധ്യവും നൽകുമെന്ന് ആകാശ് അംബാനി പറഞ്ഞു. അന്താരാഷ്ട്ര ക്രിക്കറ്റിലെ പരിചയസമ്പത്തും വിവിധ സാഹചര്യങ്ങളിൽ മികച്ച പ്രകടനം നടത്താനുള്ള കഴിവും അർഷ്ദീപിന്റെ പ്രത്യേകതകളാണ്.
അർഷ്ദീപിനെ മുംബൈ ഇന്ത്യൻസിന്റെ കുടുംബത്തിലേക്ക് സ്വാഗതം ചെയ്യുന്നതായും ഐപിഎൽ 2027ൽ ബ്ലൂ ആൻഡ് ഗോൾഡ് ജഴ്സിയിൽ താരത്തെ കാണാൻ ആരാധകർക്ക് കഴിയുമെന്നും ഫ്രാഞ്ചൈസി അറിയിച്ചു.
അതേസമയം, പുതിയ സീസണിൽ ടീമിന്റെ നായകസ്ഥാനത്തേക്ക് ആരെ പരിഗണിക്കുമെന്ന കാര്യത്തിൽ മുംബൈ ഇന്ത്യൻസ് ഇതുവരെ തീരുമാനമെടുത്തിട്ടില്ല. ക്യാപ്റ്റൻസി സംബന്ധിച്ച പ്രഖ്യാപനം ഉചിതമായ സമയത്ത് നടത്തുമെന്നും ഫ്രാഞ്ചൈസി വ്യക്തമാക്കി.
