loginkerala
കൊച്ചി: ഭൂട്ടാൻ വാഹനക്കടത്ത് കേസിൽ നടൻ ദുൽഖർ സൽമാനെ വീണ്ടും ചോദ്യം ചെയ്യാൻ കസ്റ്റംസ് ഒരുങ്ങുന്നു. ദുൽഖറിന്റെ പേരിൽ കൂടുതൽ ആഡംബര വാഹനങ്ങൾ രജിസ്റ്റർ ചെയ്തിട്ടുണ്ടെന്ന കണ്ടെത്തലിനെ തുടർന്നാണ് അന്വേഷണ സംഘം വീണ്ടും മൊഴിയെടുക്കാൻ തീരുമാനിച്ചിരിക്കുന്നത്.
ഈ വാഹനങ്ങൾ നിലവിൽ എവിടെയാണെന്നും അവയുടെ ഉടമസ്ഥാവകാശവും ഇടപാടുകളും സംബന്ധിച്ച വിവരങ്ങൾ ശേഖരിക്കാനാണ് കസ്റ്റംസ് ശ്രമം. ഇതിന്റെ ഭാഗമായി ചെന്നൈ ഉൾപ്പെടെ വിവിധ സ്ഥലങ്ങളിൽ പരിശോധന തുടരുകയാണെന്നാണ് വിവരം.
ഇതുവരെ നടന്നത് പ്രാഥമിക ചോദ്യം ചെയ്യൽ മാത്രമാണെന്നും അന്വേഷണം ഇപ്പോഴും പുരോഗമിക്കുകയാണെന്നും കസ്റ്റംസ് ഉദ്യോഗസ്ഥർ അറിയിച്ചു.
നേരത്തെ കസ്റ്റംസിന് നൽകിയ മൊഴിയിൽ, വാഹനങ്ങൾ നിയമാനുസൃതമായാണ് വാങ്ങിയതെന്നും വാഹനക്കടത്തുമായി ബന്ധപ്പെട്ട അനധികൃത പ്രവർത്തനങ്ങളെക്കുറിച്ച് തനിക്ക് അറിവില്ലെന്നും ദുൽഖർ സൽമാൻ വ്യക്തമാക്കിയിരുന്നു. എന്നാൽ ലഭ്യമായ വിവരങ്ങളുടെ അടിസ്ഥാനത്തിൽ കൂടുതൽ വ്യക്തത വരുത്തുന്നതിനായി വീണ്ടും ചോദ്യം ചെയ്യാനാണ് അന്വേഷണ സംഘത്തിന്റെ നീക്കം.
