കോഴിക്കോട്: നാദാപുരം പഞ്ചായത്തിലെ കുമ്മങ്കോട് ബദരിയ പള്ളിക്ക് സമീപം അജ്ഞാത ജീവിയുടെ ആക്രമണത്തിൽ രണ്ടുപേർക്ക് പരിക്കേറ്റു. കുമ്മങ്കോട് എരഞ്ഞിക്കൽ സിനാൻ (19), കുഞ്ഞാമി (65) എന്നിവർക്കാണ് പരിക്കേറ്റത്. തിങ്കളാഴ്ച ഉച്ചയ്ക്ക് ഒന്നരയ്ക്ക് വീടിനോട് ചേർന്ന പറമ്പിൽ കാട് വെട്ടുന്നതിനിടെയായിരുന്നു സംഭവം. അജ്ഞാത ജീവിയുടെ ആക്രമണത്തിൽ സിനാൻറെ നെഞ്ചിലും തലയുടെ പിൻഭാഗത്തും കുഞ്ഞാമിയുടെ മുഖത്തുമാണ് പരിക്കേറ്റത്.
നാട്ടുകാർ ചേർന്ന് ഇരുവരെയും നാദാപുരത്തെ ആശുപത്രിയിലും തുടർന്ന് വിദഗ്ധ ചികിത്സയ്ക്കായി വടകരയിലെ സ്വകാര്യ ആശുപത്രിയിലും പ്രവേശിപ്പിച്ചു. അജ്ഞാത ജീവി ഓടിപ്പോകുന്നത് സമീപത്തെ വീട്ടുമുറ്റത്ത് കളിച്ചുകൊണ്ടിരുന്ന പത്തുവയസുകാരൻ കണ്ടിരുന്നു. ഇതിനിടെ കുമ്മങ്കോട് സ്വദേശി നൊട്ടീൻറവിട റംഷാദ് മൊബൈൽ ഫോണിൽ പകർത്തിയ ദൃശ്യങ്ങളിലും ജീവി ഓടിപ്പോകുന്നത് കാണാം. ദൃശ്യത്തിലുള്ളത് പുലിയാണെന്നാണ് നാട്ടുകാരുടെ സംശയം.
