loginkerala
തിരുവനന്തപുരം: എൻഫോഴ്‌സ്‌മെന്റ് ഡയറക്ടറേറ്റിനെയും മുൻ ഗവർണർ രാജേന്ദ്ര വിശ്വനാഥ് ആർലേക്കറെയും വിമർശിച്ച് മന്ത്രി ഷിബു ബേബി ജോൺ. പിഎസ്‌സി ചെയർമാനെയും അംഗങ്ങളെയും പുറത്താക്കണമെന്ന ആർലേക്കറുടെ ശുപാർശയോട് യോജിപ്പില്ലെന്ന് അദ്ദേഹം വ്യക്തമാക്കി.
ഇഡി കേന്ദ്രസർക്കാരിന്റെ രാഷ്ട്രീയ ആയുധമായി പ്രവർത്തിക്കുകയാണെന്ന് ഷിബു ബേബി ജോൺ ആരോപിച്ചു. ഇഡി പറയുന്നതുപോലെ പ്രവർത്തിക്കാനല്ല ജനങ്ങൾ യുഡിഎഫിനെ തെരഞ്ഞെടുത്തതെന്നും അദ്ദേഹം വാർത്താസമ്മേളനത്തിൽ പറഞ്ഞു.
ഗവർണർ ഏത് ഭരണഘടനാപരമായ അധികാരം ഉപയോഗിച്ചാണ് ഇത്തരമൊരു നടപടി സ്വീകരിച്ചതെന്ന് മനസ്സിലാകുന്നില്ലെന്നും അദ്ദേഹം പറഞ്ഞു. അധികാരദുർവിനിയോഗം ശരിയല്ല. മന്ത്രിസഭയുടെ നിർദേശപ്രകാരം പ്രവർത്തിക്കേണ്ട ഗവർണർ സ്വന്തം ഇഷ്ടപ്രകാരം മുന്നോട്ടുപോകുന്നതിനോട് യോജിപ്പില്ലെന്നും അത് ഭരണഘടനാവിരുദ്ധമാണെന്നും ഷിബു ബേബി ജോൺ വ്യക്തമാക്കി.
രാജ്യത്ത് വിശ്വാസ്യതയില്ലാത്ത അന്വേഷണ ഏജൻസിയാണ് ഇഡിയെന്നും അദ്ദേഹം വിമർശിച്ചു. ബാഹ്യശക്തികളുടെ സമ്മർദത്തിന് വഴങ്ങിയല്ല സർക്കാർ പ്രവർത്തിക്കേണ്ടതെന്നും ഷിബു ബേബി ജോൺ പറഞ്ഞു. ഇഡി, ഗവർണർ എന്നിവരുടെ നടപടികളെച്ചൊല്ലി യുഡിഎഫിനുള്ളിൽ അഭിപ്രായവ്യത്യാസം ഉയരുന്ന സാഹചര്യത്തിലാണ് മന്ത്രിയുടെ പ്രതികരണം.
