loginkerala
ന്യൂഡൽഹി: പരീക്ഷാ ക്രമക്കേടുമായി ബന്ധപ്പെട്ട പ്രതിഷേധങ്ങൾക്കിടെ പ്രധാനമന്ത്രി പാർലമെന്റിൽ നേരിട്ട് പ്രസ്താവന നടത്താതെ വീഡിയോ സന്ദേശത്തിലൂടെ പ്രതികരിച്ചതിനെതിരെ കോൺഗ്രസ് അധ്യക്ഷൻ മല്ലികാർജുൻ ഖാർഗെ രംഗത്ത്.
രാത്രിയിൽ വീഡിയോ സന്ദേശം പുറത്തിറക്കുന്നതിന് പകരം പകൽ പാർലമെന്റിൽ എത്തി വിഷയത്തിൽ വിശദീകരണം നൽകണമെന്ന് ഖാർഗെ ആവശ്യപ്പെട്ടു. ചോദ്യപേപ്പർ ചോർച്ചയുമായി ബന്ധപ്പെട്ട് കർശന നടപടി സ്വീകരിക്കുമെന്ന് പ്രധാനമന്ത്രി അർദ്ധരാത്രിയോടെ പുറത്തിറക്കിയ വീഡിയോ സന്ദേശത്തിൽ ഉറപ്പുനൽകിയിരുന്നു.
ഈ വിഷയത്തിൽ സർക്കാർ നിലപാട് പാർലമെന്റിൽ അവതരിപ്പിക്കുകയാണ് ജനാധിപത്യപരമായ നടപടിയെന്നും, പ്രധാനമന്ത്രിയുടെ പ്രഖ്യാപനം ഉത്തരവാദിത്വപരമായ ഉറപ്പാണെങ്കിൽ അത് സഭയിൽ അവതരിപ്പിക്കണമെന്നും ഖാർഗെ പറഞ്ഞു.
അങ്ങനെ ചെയ്താൽ പ്രതിപക്ഷത്തിന് സർക്കാരിന്റെ നിലപാട് ചർച്ച ചെയ്യാനും പരിശോധിക്കാനും അവസരം ലഭിക്കുമെന്നും അദ്ദേഹം മാധ്യമങ്ങളോട് വ്യക്തമാക്കി.
