loginkerala
സിനിമയ്ക്ക് സ്വന്തമായി ഒരു പേരിടാൻ പോലും സാധിക്കാത്ത സാഹചര്യമാണ് സെൻസർ ബോർഡിന്റെ പുതിയ മാർഗനിർദേശങ്ങൾ സൃഷ്ടിക്കുന്നതെന്ന് കേരള ഫിലിം ചേംബർ. സെൻസർ സർട്ടിഫിക്കറ്റ് ലഭിക്കുന്നത് വരെ സിനിമയുടെ ടൈറ്റിൽ അന്തിമമായി കണക്കാക്കില്ലെന്ന സെൻസർ ബോർഡിന്റെ പുതിയ വ്യവസ്ഥയ്ക്കെതിരെ കടുത്ത പ്രതിഷേധവുമായി ചേംബർ രംഗത്തെത്തി. വിഷയത്തിൽ ശക്തമായ ആശങ്ക രേഖപ്പെടുത്തി ഫിലിം ചേംബർ ജനറൽ സെക്രട്ടറി സോണി തോമസ് ജോൺ സെൻസർ ബോർഡ് സി.ഇ.ഒ രാജേന്ദ്ര സിങ്ങിന് കത്തയച്ചു.
സിനിമാ നിർമാണത്തിന്റെ ഏറ്റവും അവസാന ഘട്ടത്തിലാണ് ചിത്രങ്ങൾ സെൻസർ ബോർഡിന്റെ അനുമതിക്കായി സമർപ്പിക്കുന്നത്. റിലീസിനോട് അടുത്ത ഈ സമയത്ത് ബോർഡ് പേരുമാറ്റം നിർദേശിച്ചാൽ അത് നിർമാതാക്കൾക്ക് വലിയ സാമ്പത്തിക നഷ്ടമുണ്ടാക്കുമെന്ന് കത്തിൽ ചൂണ്ടിക്കാണിക്കുന്നു. ചിത്രത്തിന് ഒരു ടൈറ്റിൽ പോലും തീരുമാനിക്കാൻ കഴിയാത്ത ഈ സാഹചര്യം അംഗീകരിക്കാൻ കഴിയില്ലെന്നാണ് ചേംബറിന്റെ ഉറച്ച നിലപാട്.
അതേസമയം, ബോർഡ് മുന്നോട്ടുവെച്ച മറ്റ് നാല് പുതിയ നിർദേശങ്ങൾ അനുസരിക്കാൻ തങ്ങൾ തയ്യാറാണെന്നും ഫിലിം ചേംബർ വ്യക്തമാക്കിയിട്ടുണ്ട്. നിലവിൽ മലയാള സിനിമകളുടെ ടൈറ്റിൽ രജിസ്‌ട്രേഷൻ നടപടികൾ കൈകാര്യം ചെയ്യുന്നത് ഫിലിം ചേംബറാണ്.
എന്താണ് പുതിയ മാർഗനിർദേശങ്ങൾ?
കഴിഞ്ഞ ഒക്ടോബർ 26-നാണ് സെൻസർ ബോർഡ് പുതുക്കിയ മാർഗനിർദേശങ്ങൾ പുറത്തിറക്കിയത്. 18 അംഗങ്ങളെ ഉൾപ്പെടുത്തി സെൻസർ ബോർഡ് പുനഃസംഘടിപ്പിച്ചതിന് പിന്നാലെയായിരുന്നു ഈ നടപടികൾ. നിർമാണം പൂർത്തിയാകാത്ത സിനിമകൾ സർട്ടിഫിക്കേഷനായി സമർപ്പിക്കരുത്, മുൻകൂട്ടി പ്രഖ്യാപിച്ച റിലീസ് തീയതികൾ സർട്ടിഫിക്കേഷൻ നടപടികളിൽ പരിഗണിക്കില്ല, അതുപോലെ തന്നെ നേരത്തെ പ്രഖ്യാപിച്ച പേര് അന്തിമമായിരിക്കില്ല എന്നിവയായിരുന്നു പ്രധാന വ്യവസ്ഥകൾ.
1952-ലെ സിനിമറ്റോഗ്രാഫ് ആക്ടിലെ സെക്ഷൻ 5B(1), 2024-ലെ സിനിമറ്റോഗ്രാഫ് റൂൾസിലെ റൂൾ 25 എന്നിവ പ്രകാരം ചിത്രത്തിന്റെ പേര് പരിശോധിക്കാനും ആവശ്യമെങ്കിൽ അതിൽ മാറ്റങ്ങൾ വരുത്താനും എക്‌സാമിനിങ്, റിവിസിങ് കമ്മിറ്റികൾക്ക് പൂർണ്ണ അധികാരമുണ്ടെന്നാണ് ബോർഡിന്റെ വാദം.
തുടർക്കഥയാകുന്ന ടൈറ്റിൽ വിവാദങ്ങൾ
സിനിമാ നിർമാതാക്കളും സെൻസർ ബോർഡും തമ്മിൽ ടൈറ്റിലുകളുമായി ബന്ധപ്പെട്ട് മുൻകാലങ്ങളിലുണ്ടായ വലിയ തർക്കങ്ങളുടെ പശ്ചാത്തലത്തിലാണ് ഈ പുതിയ വ്യവസ്ഥകൾ വന്നിട്ടുള്ളത്. തമിഴ്‌നാട് മുഖ്യമന്ത്രി നായകനായ ‘ജനനായകൻ’ എന്ന ചിത്രത്തിന് സെൻസർ ബോർഡ് അനുമതി വൈകിപ്പിച്ചതും, ദിൽജിത് ദൊസാഞ്ജിന്റെ ‘സത്‌ലജ്’ എന്ന സിനിമയ്ക്ക് അനുമതി നിഷേധിച്ചതും വലിയ വിവാദമായിരുന്നു. മലയാളത്തിൽ സുരേഷ് ഗോപി നായകനായ ‘ജാനകി v/s സ്‌റ്റേറ്റ് ഓഫ് കേരള’ എന്ന ചിത്രത്തിനും പേര് മാറ്റിയതിന് ശേഷം മാത്രമാണ് ബോർഡ് അനുമതി നൽകിയത്
