loginkerala
വയനാട്: പാരമ്പര്യ നെൽവിത്തുകളുടെ സംരക്ഷകനും പത്മശ്രീ പുരസ്‌കാര ജേതാവുമായ കർഷകൻ ചെറുവയൽ രാമൻ (74) അന്തരിച്ചു. വാർധക്യസഹജമായ അസുഖങ്ങളെ തുടർന്ന് കോഴിക്കോട് മെഡിക്കൽ കോളജ് ആശുപത്രിയിൽ ചികിത്സയിലിരിക്കെയായിരുന്നു അന്ത്യം. വയനാട്ടുകാർ സ്നേഹത്തോടെ ‘നെല്ലച്ഛൻ’ എന്ന് വിളിച്ചിരുന്ന അദ്ദേഹത്തിന്റെ വിയോഗം കാർഷിക മേഖലയ്ക്കും പാരമ്പര്യ കൃഷിരീതികൾക്കും വലിയ നഷ്ടമാണ്.
1952 ജൂൺ ആറിന് ജനിച്ച തലക്കര ചെറിയ രാമൻ എന്ന ചെറുവയൽ രാമൻ, കമ്മന നവോദയ എൽ.പി. സ്കൂളിലെ പ്രാഥമിക വിദ്യാഭ്യാസത്തിനു ശേഷം പത്താം വയസിൽ തന്നെ കാർഷിക മേഖലയിലേക്ക് തിരിഞ്ഞു. കൃഷിയോടുള്ള അടങ്ങാത്ത അഭിനിവേശം കാരണം 1969-ൽ കണ്ണൂർ ഡി.എം.ഒ. ഓഫീസിൽ ലഭിച്ച സർക്കാർ ജോലി പോലും അദ്ദേഹം ഉപേക്ഷിച്ചു.
വംശനാശ ഭീഷണി നേരിട്ടിരുന്ന 45-ലേറെ തദ്ദേശീയ നെൽവിത്തിനങ്ങളെ സംരക്ഷിച്ച് നിലനിർത്തിയതിലൂടെയാണ് കുറിച്യ സമുദായാംഗമായ ചെറുവയൽ രാമൻ ദേശീയ ശ്രദ്ധ നേടിയത്. മാനന്തവാടി കമ്മന സ്വദേശിയായ അദ്ദേഹം പതിറ്റാണ്ടുകളായി പൂർണമായും ജൈവരീതിയിലാണ് കൃഷി ചെയ്തിരുന്നത്. നെൽവിത്തുകൾക്കു പുറമേ പാരമ്പര്യ പച്ചക്കറികൾ, ഔഷധസസ്യങ്ങൾ, വിവിധയിനം വൃക്ഷങ്ങൾ എന്നിവയും തന്റെ കൃഷിയിടത്തിൽ അദ്ദേഹം സംരക്ഷിച്ചുപോന്നു.
വിളവെടുത്ത നെല്ല് ഒരാഴ്ചയോളം വെയിലും മഞ്ഞുമേൽപ്പിച്ച ശേഷം ചൂടാക്കിയ മുളങ്കൂട്ടയിലും വൈക്കോൽ കൊണ്ടുള്ള വിത്തുകൂടയിലും സൂക്ഷിക്കുന്ന പരമ്പരാഗത രീതിയാണ് അദ്ദേഹം പിന്തുടർന്നിരുന്നത്. ഈ രീതിയിൽ സൂക്ഷിക്കുന്ന വിത്തുകൾക്ക് രണ്ടുവർഷം വരെ മുളയ്ക്കൽശേഷി നിലനിർത്താനാകുമെന്ന അറിവും അദ്ദേഹം പ്രയോഗത്തിലൂടെ കാത്തുസൂക്ഷിച്ചു.
വിത്തുകൾ തേടിയെത്തുന്നവർക്ക് പണം വാങ്ങിയല്ല അദ്ദേഹം അവ വിതരണം ചെയ്തിരുന്നത്. പകരം, അടുത്ത കൃഷിക്കാലത്ത് തത്തുല്യമായ വിത്തുകൾ തിരികെ നൽകണമെന്ന നിബന്ധനയോടെയായിരുന്നു കൈമാറ്റം. വിത്തുകളുടെ സംരക്ഷണവും കൈമാറ്റവും സമൂഹത്തിന്റെ ഉത്തരവാദിത്വമായി കണ്ട അദ്ദേഹത്തിന്റെ പ്രവർത്തനം പാരമ്പര്യ കാർഷിക അറിവുകൾ അടുത്ത തലമുറയിലേക്ക് കൈമാറുന്നതിനും സഹായകമായി.
ഗീതയാണ് ഭാര്യ. മക്കൾ: രമണി, രമേശൻ, രാജേഷ്.
പാരമ്പര്യ നെൽവിത്തുകളെ വരുംതലമുറയ്ക്കായി കാത്തുസൂക്ഷിച്ച ചെറുവയൽ രാമൻ, മണ്ണിനെയും കൃഷിയെയും പ്രകൃതിയെയും ചേർത്തുപിടിച്ച ജീവിതത്തിലൂടെയാണ് മലയാളികളുടെ മനസ്സിൽ ഇടംനേടിയത്.
