loginkerala
തിരുവനന്തപുരം: മുഖ്യമന്ത്രി അപമാനിച്ചെന്ന എൻഎസ്എസ് ജനറൽ സെക്രട്ടറി ജി. സുകുമാരൻ നായരുടെ ആരോപണവുമായി ബന്ധപ്പെട്ട വിവാദത്തിൽ പ്രതിപക്ഷ നേതാവ് വി.ഡി. സതീശനെ പിന്തുണച്ച് മുൻമന്ത്രി കെ.ബി. ഗണേഷ്കുമാർ. വി.ഡി. സതീശൻ എൻഎസ്എസിനെയോ മറ്റേതെങ്കിലും സമുദായത്തെയോ അധിക്ഷേപിക്കുന്ന തരത്തിൽ സംസാരിക്കുന്നത് താൻ കണ്ടിട്ടില്ലെന്നും, വ്യക്തിപരമായി അറിയുന്ന ആളായതിനാൽ അദ്ദേഹത്തിനെതിരായ ഇത്തരം വിമർശനങ്ങൾ ന്യായീകരിക്കാനാകില്ലെന്നും ഗണേഷ്കുമാർ പറഞ്ഞു.
ഇതിനൊപ്പം എൻഎസ്എസ് നേതൃത്വത്തിനെതിരെയും ഗണേഷ്കുമാർ രൂക്ഷ വിമർശനം ഉന്നയിച്ചു. ഏകാധിപത്യ ശൈലിയിൽ പ്രവർത്തിക്കുന്ന നേതൃത്വത്തിന് ദീർഘകാലം നിലനിൽക്കാനാകില്ലെന്നും, സത്യത്തിന് എതിരായി നിൽക്കുന്നവർ ഒടുവിൽ തകർന്നുപോകുമെന്നും അദ്ദേഹം അഭിപ്രായപ്പെട്ടു.
ആർ. ബാലകൃഷ്ണപ്പിള്ളയെ തള്ളിപ്പറയുന്നവരാണ് ഇന്ന് എൻഎസ്എസ് നേതൃത്വത്തിലുള്ളതെന്നും ഗണേഷ്കുമാർ ആരോപിച്ചു. മന്നത്ത് പത്മനാഭൻ പൊതുസമൂഹത്തിന്റെ പൈതൃകമാണെന്നും, അദ്ദേഹത്തെ കാണാനും അദ്ദേഹത്തിന്റെ ആശയങ്ങൾ അടുത്ത തലമുറയ്ക്ക് പരിചയപ്പെടുത്താനും എല്ലാവർക്കും അവസരം ലഭിക്കണമെന്നും അദ്ദേഹം പറഞ്ഞു. മന്നത്ത് പത്മനാഭൻ ആരുടേയും സ്വകാര്യസ്വത്തല്ലെന്നും, അദ്ദേഹവുമായി ബന്ധപ്പെട്ട കേന്ദ്രങ്ങളും എല്ലാവർക്കും തുറന്നുകൊടുക്കണമെന്നും ഗണേഷ്കുമാർ ആവശ്യപ്പെട്ടു.
അതേസമയം, ആശുപത്രികളിൽ പൊതിച്ചോർ വിതരണം സംബന്ധിച്ച് ആരോഗ്യമന്ത്രി കെ. മുരളീധരൻ നടത്തിയ പരാമർശത്തെയും ഗണേഷ്കുമാർ വിമർശിച്ചു. ഡി.വൈ.എഫ്.ഐയുടെ ‘ഹൃദയപൂർവ്വം’ പദ്ധതിയിലൂടെ നടക്കുന്ന പൊതിച്ചോർ വിതരണം പാവപ്പെട്ട രോഗികൾക്ക് വലിയ ആശ്രയമാണെന്നും, അത് തടയാൻ പാടില്ലെന്നും അദ്ദേഹം പറഞ്ഞു. പൊതിച്ചോർ വിതരണം തടയുന്ന സാഹചര്യമുണ്ടെങ്കിൽ അതിന് പകരം സർക്കാർ തന്നെ ഭക്ഷണം ഉറപ്പാക്കണമെന്നും അദ്ദേഹം ആവശ്യപ്പെട്ടു.
ഡി.വൈ.എഫ്.ഐയുടെ പൊതിച്ചോർ വിതരണം ബോർഡ് വെച്ചാലും ഇല്ലെങ്കിലും തുടരുമെന്നും, ഇത്തരം ജനകീയ പ്രവർത്തനങ്ങൾ തുടരേണ്ടതുണ്ടെന്നും ഗണേഷ്കുമാർ കൂട്ടിച്ചേർത്തു. യൂത്ത് കോൺഗ്രസിന് ചെയ്യാൻ കഴിയാത്ത സേവനമാണ് ഡി.വൈ.എഫ്.ഐ നടത്തുന്നതെന്ന അഭിപ്രായവും അദ്ദേഹം പ്രകടിപ്പിച്ചു.
