loginkerala
തിരുവനന്തപുരം:ബോർഡ്–കോർപ്പറേഷൻ സ്ഥാനവിഭജനത്തെച്ചൊല്ലി കോൺഗ്രസിനുള്ളിൽ ഭിന്നത രൂക്ഷമാകുന്നതായി റിപ്പോർട്ട്. സ്ഥാനവിഭജനത്തിൽ വേണ്ടത്ര കൂടിയാലോചനകൾ നടക്കുന്നില്ലെന്ന ആക്ഷേപമാണ് പാർട്ടിയിൽ പുതിയ ചേരികൾ രൂപപ്പെടാൻ കാരണമാകുന്നത്. നാലുമാസം പിന്നിട്ടിട്ടും നിയമനങ്ങൾ പൂർത്തിയാകാത്തതും മുഖ്യമന്ത്രി വി.ഡി. സതീശൻ ഏകപക്ഷീയമായി പെരുമാറുന്നുവെന്ന വിമർശനവും പാർട്ടിക്കുള്ളിൽ അതൃപ്തി ശക്തമാക്കുന്നു.
പാർട്ടി നേതൃത്വത്തിനും മുഖ്യമന്ത്രിക്കുമെതിരെ സമീപദിവസങ്ങളിൽ ചില യുവനേതാക്കൾ നടത്തുന്ന പരസ്യപ്രതികരണങ്ങൾ ആസൂത്രിതമാണെന്ന വിലയിരുത്തലും ഉയരുന്നുണ്ട്. വരും ദിവസങ്ങളിലും ബോർഡ്–കോർപ്പറേഷൻ നിയമനങ്ങളിൽ കൃത്യമായ കൂടിയാലോചനകൾ ഉണ്ടായില്ലെങ്കിൽ മുതിർന്ന നേതാക്കൾ തന്നെ പരസ്യമായി രംഗത്തെത്തിയേക്കുമെന്നാണ് സൂചന.
അതിനിടെ, മുഖ്യമന്ത്രിക്കെതിരെ നിരന്തരം വിമർശനം ഉന്നയിക്കുന്ന യുഡിഎഫ് കൺവീനർ അടൂർ പ്രകാശ് എം.പിക്കെതിരെ മന്ത്രി കെ. മുരളീധരൻ രംഗത്തെത്തി. ഒരാൾ നിരന്തരം മുഖ്യമന്ത്രിയെ വിമർശിക്കുന്നുണ്ടെങ്കിൽ അതിന് പിന്നിൽ ആരെങ്കിലും ഉണ്ടാകാമെന്നാണ് മന്ത്രി മാധ്യമങ്ങളോട് പ്രതികരിച്ചത്. വിഷയത്തിൽ പാർട്ടിയുടെ ദേശീയ നേതൃത്വം ഇടപെട്ട് ആവശ്യമായ നടപടികൾ സ്വീകരിക്കുമെന്നും അദ്ദേഹം കൂട്ടിച്ചേർത്തു.
കെപിസിസി പ്രസിഡന്റ് സ്ഥാനത്തുനിന്ന് കെ. സുധാകരനെ പുറത്താക്കിയതുപോലെ തന്നെയും മാറ്റാൻ നീക്കം നടക്കുന്നുണ്ടെന്ന് സംശയിക്കുന്നതായി അടൂർ പ്രകാശ് നേരത്തേ വെളിപ്പെടുത്തിയിരുന്നു. തന്നെ മോശക്കാരനായി ചിത്രീകരിക്കാനുള്ള ശ്രമങ്ങൾ സമൂഹമാധ്യമങ്ങളിലടക്കം നടക്കുന്നുണ്ടെന്നും അദ്ദേഹം ആരോപിച്ചിരുന്നു.
സ്ഥാനവിഭജനത്തെച്ചൊല്ലിയുള്ള തർക്കങ്ങളും നേതാക്കളുടെ പരസ്യപ്രതികരണങ്ങളും കോൺഗ്രസിനുള്ളിലെ അസ്വാരസ്യങ്ങൾ കൂടുതൽ ശക്തമാക്കുകയാണ്. വരും ദിവസങ്ങളിൽ ദേശീയ നേതൃത്വം വിഷയത്തിൽ ഇടപെടുമോയെന്നാണ് രാഷ്ട്രീയ കേന്ദ്രങ്ങൾ ഉറ്റുനോക്കുന്നത്.
വാർത്തയിലെ വസ്തുതാപരമായ വൈരുദ്ധ്യങ്ങൾ തിരുത്തുക
