loginkerala
തിരുവനന്തപുരം: തെരഞ്ഞെടുപ്പ് കമ്മീഷൻ ഗ്യാനേഷ് കുമാറിനെതിരേ കോൺഗ്രസ് ആഹ്വാനം ചെയ്ത പ്രതിഷേധത്തിൽ പങ്കെടുക്കുമെന്ന് മുഖ്യമന്ത്രി വി.ഡി. സതീശൻ. നവംബർ ഒന്നിന് ന്യൂഡൽഹിയിലെ രാംലീല മൈതാനിയിൽ നടക്കുന്ന ഇന്ത്യാ മുന്നണിയുടെ പ്രതിഷേധ റാലിയിൽ പങ്കെടുക്കുമെന്ന് അദ്ദേഹം എക്‌സിലെ കുറിപ്പിലൂടെ വ്യക്തമാക്കി.
ജനാധിപത്യത്തെയും ഭരണഘടനയെയും പൗരന്മാരുടെ വോട്ടവകാശത്തെയും സംരക്ഷിക്കുകയാണ് പ്രതിഷേധത്തിന്റെ ലക്ഷ്യമെന്ന് വി.ഡി. സതീശൻ പറഞ്ഞു. ജനാധിപത്യം ഭീഷണി നേരിടുമ്പോൾ നിശബ്ദരായിരിക്കില്ലെന്ന പ്രഖ്യാപനമാണ് പ്രതിഷേധമെന്നും അദ്ദേഹം കുറിച്ചു.
വോട്ടർ പട്ടികയിലെ പ്രത്യേക തീവ്ര പരിഷ്കരണമായ (എസ്.ഐ.ആർ) വിഷയവുമായി ബന്ധപ്പെട്ട് സെപ്റ്റംബർ 30-ന് ചേർന്ന ഇന്ത്യാ മുന്നണി യോഗത്തിലാണ് സംയുക്ത പ്രതിഷേധ പരിപാടികൾക്ക് രൂപം നൽകിയത്. ഇതിന്റെ ഭാഗമായി രാജ്യവ്യാപകമായി റാലികളും ജനാധിപത്യ സംരക്ഷണ മാർച്ചുകളും സംഘടിപ്പിക്കാൻ തീരുമാനിച്ചിരുന്നു.
ഇലക്ട്രോണിക് വോട്ടിങ് മെഷീനുകൾക്ക് പകരം ബാലറ്റ് പേപ്പർ ഉപയോഗിച്ച് തിരഞ്ഞെടുപ്പ് നടത്തണമെന്ന ആവശ്യത്തിൽ മുന്നണിയിലെ എല്ലാ കക്ഷികൾക്കും യോജിപ്പുണ്ടെന്ന് കോൺഗ്രസ് അധ്യക്ഷൻ മല്ലികാർജുൻ ഖാർഗെ നേരത്തെ വ്യക്തമാക്കിയിരുന്നു. ഇതിന്റെ തുടർച്ചയായാണ് നവംബർ ഒന്നിന് ഡൽഹിയിൽ വൻ പ്രതിഷേധ റാലി സംഘടിപ്പിക്കുന്നത്.
