loginkerala
തിരുവനന്തപുരം: സി.എം.ആർ.എൽ–എക്സാലോജിക് ഇടപാടുമായി ബന്ധപ്പെട്ട് എൻഫോഴ്സ്മെന്റ് ഡയറക്ടറേറ്റ് (ഇ.ഡി.) സമർപ്പിച്ച റിപ്പോർട്ടിന്റെ അടിസ്ഥാനത്തിൽ മുൻ മുഖ്യമന്ത്രിയും നിലവിലെ പ്രതിപക്ഷനേതാവുമായ പിണറായി വിജയനെതിരെ അന്വേഷണം നടത്താൻ സർക്കാർ ഉത്തരവിട്ടതായി റിപ്പോർട്ട്. പിണറായി വിജയന് പുറമെ മകൾ ടി. വീണ, മരുമകനും മുൻ മന്ത്രിയുമായ പി.എ. മുഹമ്മദ് റിയാസ് എന്നിവർക്കെതിരെയും അന്വേഷണം നടത്താനാണ് തീരുമാനം.
മുഖ്യമന്ത്രി വി.ഡി. സതീശനും ആഭ്യന്തരമന്ത്രി രമേശ് ചെന്നിത്തലയും തമ്മിൽ നടത്തിയ കൂടിക്കാഴ്ചയ്ക്കു പിന്നാലെയാണ് തുടർനടപടിക്ക് തീരുമാനമായത്. കേസിൽ എഫ്.ഐ.ആർ രജിസ്റ്റർ ചെയ്ത് അന്വേഷണം നടത്തുന്നതിനുള്ള നടപടികളാണ് സർക്കാർ സ്വീകരിക്കുന്നത്.
സി.എം.ആർ.എൽ–എക്സാലോജിക് ഇടപാടുമായി ബന്ധപ്പെട്ട് അഴിമതി നിരോധന നിയമപ്രകാരം കേസ് രജിസ്റ്റർ ചെയ്യണമെന്നാവശ്യപ്പെട്ടാണ് ഇ.ഡി. സംസ്ഥാന പോലീസ് മേധാവിക്ക് റിപ്പോർട്ട് നൽകിയത്. ഇടപാടുകളിൽ അനധികൃത പണമിടപാടുകളും ഹവാല ഇടപാടുമായി ബന്ധപ്പെട്ട ആരോപണങ്ങളും ഉണ്ടെന്നാണ് ഇ.ഡി. റിപ്പോർട്ടിലെ കണ്ടെത്തലുകൾ.
ഇ.ഡി. റിപ്പോർട്ടിൽ എക്സാലോജിക് സൊല്യൂഷൻസിന് സി.എം.ആർ.എല്ലിൽ നിന്ന് 2.78 കോടി രൂപ ലഭിച്ചതും ഇതിന് തത്തുല്യമായ സേവനങ്ങൾ നൽകിയിട്ടില്ലെന്നുമുള്ള ആരോപണങ്ങളാണ് പ്രധാനമായും ഉന്നയിച്ചിരിക്കുന്നത്. ഈ ഇടപാടുകൾക്ക് പിന്നിൽ അനധികൃത പണമിടപാടുകൾ നടന്നിട്ടുണ്ടെന്നാണ് അന്വേഷണ ഏജൻസിയുടെ ആരോപണം. ആരോപണങ്ങൾ പിണറായി വിജയനും കുടുംബവും നേരത്തെ നിഷേധിച്ചിട്ടുണ്ട്.
റിപ്പോർട്ടിൽ തുടർനടപടിക്ക് നിയമോപദേശം തേടിയിരുന്നു. എഫ്.ഐ.ആർ രജിസ്റ്റർ ചെയ്യുന്നതിന് ആവശ്യമായ നിയമപരമായ സാഹചര്യമുണ്ടെങ്കിൽ പോലീസിന് നടപടി സ്വീകരിക്കാമെന്നാണ് അഡ്വക്കേറ്റ് ജനറലിന്റെ നിയമോപദേശം. ആവശ്യമെങ്കിൽ എഫ്.ഐ.ആറിന് മുമ്പ് പ്രാഥമിക അന്വേഷണം നടത്താനും നിയമോപദേശത്തിൽ സാധ്യത വ്യക്തമാക്കിയിരുന്നു.
ഇ.ഡി. റിപ്പോർട്ടിലെ ആരോപണങ്ങളും ലഭ്യമായ രേഖകളും പരിശോധിച്ച ശേഷമായിരിക്കും സംസ്ഥാന പോലീസ് അന്വേഷണം മുന്നോട്ടുകൊണ്ടുപോകുക. അന്വേഷണത്തിന്റെ ഭാഗമായി ആരെയെല്ലാം ചോദ്യം ചെയ്യണം, ഏത് രീതിയിൽ അന്വേഷണം നടത്തണം തുടങ്ങിയ കാര്യങ്ങളിൽ സംസ്ഥാന പോലീസ് മേധാവി തുടർനടപടി തീരുമാനിക്കും.
