loginkerala
ബ്യൂണസ് ഐറിസ്: ലോകഫുട്ബോളിലെ ഒരു സുവർണ അധ്യായത്തിന് വിരാമമിട്ട് അർജന്റീനയുടെ ഇതിഹാസ താരം ലയണൽ മെസി രാജ്യാന്തര ഫുട്ബോളിൽ നിന്ന് ഔദ്യോഗികമായി വിരമിച്ചു. 21 വർഷം നീണ്ട രാജ്യാന്തര കരിയറിനാണ് 39-ാം വയസിൽ മെസി തിരശ്ശീലയിട്ടത്. അർജന്റീന ജേഴ്സിയോട് വിടപറയുന്ന വിവരം സമൂഹമാധ്യമങ്ങളിലൂടെ പങ്കുവെച്ച വികാരനിർഭരമായ കുറിപ്പിലൂടെയാണ് താരം ആരാധകരെ അറിയിച്ചത്.
ഹൃദയം പറിഞ്ഞുപോകുന്ന വേദനയോടെയാണ് വിരമിക്കൽ തീരുമാനമെടുത്തതെങ്കിലും പടിയിറങ്ങാനുള്ള സമയം ഇതാണെന്ന് മനസിലാക്കിയതായി മെസി പറഞ്ഞു. അർജന്റീനയ്ക്കായി കളിച്ച ഓരോ നിമിഷത്തിലും തന്റെ പരമാവധി നൽകാൻ ശ്രമിച്ചെന്നും കിരീടങ്ങൾ നേടിയ കാലത്ത് മാത്രമല്ല, പരാജയങ്ങളുടെയും നിരാശകളുടെയും ഘട്ടങ്ങളിലും രാജ്യത്തിനായി എല്ലാം നൽകിയെന്നും താരം കുറിച്ചു.
അർജന്റീനക്കാരനായി ജനിച്ചതിൽ അഭിമാനമുണ്ടെന്നും രാജ്യത്തിനായി കളിക്കാൻ കഴിഞ്ഞത് ജീവിതത്തിലെ ഏറ്റവും വലിയ ഭാഗ്യമാണെന്നും മെസി വ്യക്തമാക്കി.
അർജന്റീന ജേഴ്സിയിൽ 207 മത്സരങ്ങളിൽ നിന്ന് 125 ഗോളുകളാണ് മെസി നേടിയത്. 2008ലെ ഒളിമ്പിക്സ് സ്വർണം, 2021ലെയും 2024ലെയും കോപ്പ അമേരിക്ക കിരീടങ്ങൾ, 2022ലെ ലോകകപ്പ് എന്നിവയാണ് രാജ്യത്തിനായി മെസി നേടിയ പ്രധാന നേട്ടങ്ങൾ. ഏറെക്കാലം കാത്തിരുന്ന ലോകകപ്പ് കിരീടം അർജന്റീനയ്ക്ക് സമ്മാനിച്ച നായകനായാണ് മെസി രാജ്യാന്തര ഫുട്ബോളിനോട് വിടപറയുന്നത്.
തനിക്ക് നൽകിയ സ്നേഹത്തിനും പിന്തുണയ്ക്കും കുടുംബത്തിനും പരിശീലകർക്കും സഹതാരങ്ങൾക്കും ആരാധകർക്കും മെസി നന്ദി അറിയിച്ചു. അർജന്റീന ടീമിനെ ഇനിയും പിന്തുണയ്ക്കുമെന്നും, പ്രത്യേകിച്ച് മോശം സമയങ്ങളിൽ ടീമിനൊപ്പം കൂടുതൽ ശക്തമായി നിൽക്കുമെന്നും താരം പറഞ്ഞു.
പുതുതലമുറയിലെ മികച്ച യുവതാരങ്ങൾക്ക് അവസരം നൽകേണ്ട സമയമാണിതെന്നും മെസി കൂട്ടിച്ചേർത്തു. മൈതാനത്ത് ഇനി അർജന്റീനയ്ക്കായി പോരാടാനില്ലെങ്കിലും ഗാലറിയിൽ നിന്ന് ടീമിനായി ശബ്ദമുയർത്തുന്ന ഒരു സാധാരണ ആരാധകനായി തുടരുമെന്നാണ് മെസിയുടെ വാക്കുകൾ.
