loginkerala
കൊല്ലം: മത്സ്യത്തൊഴിലാളികളെ കാണാതായിട്ട് 11 ദിവസം പിന്നിട്ടതോടെ നീണ്ടകരയിലെത്തി മുഖ്യമന്ത്രി വി.ഡി. സതീശൻ. കടലിൽ കാണാതായ ഗൗതം കൃഷ്ണന്റെ കുടുംബത്തെ മുഖ്യമന്ത്രി സന്ദർശിച്ച് ആശ്വസിപ്പിച്ചു. രക്ഷാപ്രവർത്തനം വൈകിയെന്ന ആരോപണം മുഖ്യമന്ത്രി വീണ്ടും നിഷേധിച്ചു. തെരച്ചിൽ സംവിധാനങ്ങൾ കൂടുതൽ മെച്ചപ്പെടുത്തുമെന്നും മുഖ്യമന്ത്രി വ്യക്തമാക്കി.
കടലിൽ കാണാതായ മൂന്ന് മത്സ്യത്തൊഴിലാളികൾക്കായുള്ള തെരച്ചിൽ 11-ാം ദിവസവും തുടരുന്നതിനിടെയാണ് മുഖ്യമന്ത്രി ഉൾപ്പെടെയുള്ള മന്ത്രിമാർ നീണ്ടകരയിലെത്തിയത്. കാണാതായ മത്സ്യത്തൊഴിലാളികളുടെ വീടുകളിലെത്തി ബന്ധുക്കളുമായി സംസാരിച്ച മുഖ്യമന്ത്രി, തെരച്ചിൽ പ്രവർത്തനങ്ങൾക്ക് സാധ്യമായ എല്ലാ സഹായവും നൽകുമെന്ന് ഉറപ്പ് നൽകി.
എല്ലാ സംവിധാനങ്ങളെയും ഏകോപിപ്പിച്ചാണ് തെരച്ചിൽ നടത്തുന്നതെന്നും ചെയ്യാൻ കഴിയുന്നതിന്റെ പരമാവധി സർക്കാർ ചെയ്യുമെന്നും മുഖ്യമന്ത്രി പറഞ്ഞു. മത്സ്യത്തൊഴിലാളികളുടെ ഇൻഷുറൻസ് ചട്ടങ്ങളിൽ ആവശ്യമായ പരിഷ്കരണങ്ങൾ കൊണ്ടുവരുമെന്നും തീരസംരക്ഷണത്തിനായി കടൽഭിത്തി നിർമാണം അടിയന്തരമായി ആരംഭിക്കുമെന്നും അദ്ദേഹം വ്യക്തമാക്കി.
അതേസമയം, മുഖ്യമന്ത്രി മാപ്പ് പറയണമെന്ന കുടുംബങ്ങളുടെ ആവശ്യത്തിലും അദ്ദേഹം പ്രതികരിച്ചു. കുടുംബങ്ങളുടെ വികാരം താൻ ഉൾക്കൊള്ളുന്നുവെന്ന് പറഞ്ഞ മുഖ്യമന്ത്രി, ഭരണകൂടത്തോട് പ്രതിഷേധം ഉണ്ടാകുന്നത് സ്വാഭാവികമാണെന്നും വ്യക്തമാക്കി. ഭരണകൂടത്തിന്റെ തലവൻ മുഖ്യമന്ത്രി ആയതിനാലാണ് വിമർശനങ്ങൾ തനിക്കെതിരെ ഉയരുന്നതെന്നും അദ്ദേഹം പറഞ്ഞു.
വിഴിഞ്ഞത്ത് നിന്ന് കാണാതായ മത്സ്യത്തൊഴിലാളി ജോണിന്റെ മക്കളാണ് തീരത്തെത്താത്തതുമായി ബന്ധപ്പെട്ട മുഖ്യമന്ത്രിയുടെ പരാമർശത്തിൽ മാപ്പ് ആവശ്യപ്പെട്ടത്. തെരച്ചിൽ ഏകോപനത്തിലെ വീഴ്ചയും അലംഭാവവും ആരോപിച്ച് പ്രതിഷേധം ശക്തമായ സാഹചര്യത്തിലും വകുപ്പ് മന്ത്രി തീരത്തെത്തിയിരുന്നില്ല.
ഇതിനിടെ, നേരത്തെ തീരത്തെത്തിയ നേതാക്കൾക്ക് നേരിടേണ്ടിവന്ന പ്രതിഷേധം ചൂണ്ടിക്കാട്ടിയുള്ള മുഖ്യമന്ത്രിയുടെ പരാമർശവും വിവാദമായിരുന്നു. മത്സ്യത്തൊഴിലാളികളുടെ കുടുംബങ്ങളുടെ പ്രതിഷേധവും വികാരവും ശക്തമായി തുടരുന്നതിനിടെയാണ് 11-ാം ദിവസം മുഖ്യമന്ത്രിയും മന്ത്രിമാരും തീരപ്രദേശത്തെത്തിയത്.
