loginkerala
തിരുവനന്തപുരം: സംസ്ഥാനത്തെ മഴക്കെടുതിയിൽ ഇതുവരെ 15 പേർ മരിക്കുകയും ഏഴുപേരെ കാണാതാകുകയും ചെയ്തതായി മുഖ്യമന്ത്രി വി.ഡി. സതീശൻ അറിയിച്ചു. നിലവിൽ 316 ദുരിതാശ്വാസ ക്യാമ്പുകളിലായി പതിനൊന്നായിരത്തിലധികം പേരെ മാറ്റിപ്പാർപ്പിച്ചിട്ടുണ്ടെന്നും മുഖ്യമന്ത്രി വാർത്താസമ്മേളനത്തിൽ പറഞ്ഞു.
മഴക്കാല മുന്നൊരുക്കത്തിന്റെ ഭാഗമായി സർക്കാർ ജൂലൈ 30-നും ആഗസ്റ്റ് 1-നും ഉന്നതതല യോഗങ്ങൾ ചേർന്ന് സ്ഥിതിഗതികൾ വിലയിരുത്തിയിരുന്നുവെന്നും വെള്ളപ്പൊക്കത്തെ നേരിടുന്നതിൽ സർക്കാരിന് വീഴ്ച സംഭവിച്ചെന്ന ആരോപണം അടിസ്ഥാനരഹിതമാണെന്നും അദ്ദേഹം വ്യക്തമാക്കി.
മഴക്കെടുതിയിൽ മരിച്ചവരുടെ സംസ്കാരച്ചെലവിനായി 10,000 രൂപയും വീടുകളിൽ വെള്ളം കയറിയവർക്ക് 10,000 രൂപ വീതവും നൽകും. മരണപ്പെട്ടവരുടെ കുടുംബങ്ങൾക്ക് എട്ട് ലക്ഷം രൂപ ധനസഹായം പ്രഖ്യാപിച്ചു. ഉരുൾപൊട്ടലിൽ വീടും സ്ഥലവും നഷ്ടമായവർക്ക് 12 ലക്ഷം രൂപയും വീട് പൂർണമായും നഷ്ടമായവർക്ക് ആറ് ലക്ഷം രൂപയും ധനസഹായമായി നൽകുമെന്നും മുഖ്യമന്ത്രി അറിയിച്ചു.
ഇത്തവണ ഉണ്ടായത് മിന്നൽപ്രളയമാണെന്നും കൃത്യമായ കാലാവസ്ഥാ മുന്നറിയിപ്പ് ലഭിക്കാത്തതിനാൽ ജനങ്ങൾക്ക് മുൻകൂട്ടി മുന്നറിയിപ്പ് നൽകുന്നതിൽ കാലതാമസം നേരിട്ടതായും അദ്ദേഹം പറഞ്ഞു.
മഴക്കെടുതിയിൽ 165 ഹെക്ടർ കൃഷി നശിച്ചെന്നും 3,596 കർഷകരെ പ്രളയം ബാധിച്ചതായും മുഖ്യമന്ത്രി അറിയിച്ചു. കൃഷിനാശത്തിനുള്ള നഷ്ടപരിഹാരം വർധിപ്പിക്കുമെന്നും കൃഷിവകുപ്പിന്റെ ശുപാർശയുടെ അടിസ്ഥാനത്തിലായിരിക്കും അന്തിമ പ്രഖ്യാപനമെന്നും അദ്ദേഹം വ്യക്തമാക്കി.
സംസ്ഥാനത്തെ വലിയ അണക്കെട്ടുകൾ തുറക്കേണ്ട സാഹചര്യമില്ലെന്നും നിലവിൽ ഡാമുകളിലെ ജലനിരപ്പ് താഴ്ന്ന നിലയിലാണെന്നും മുഖ്യമന്ത്രി പറഞ്ഞു. ഡാമുകൾ തുറന്നുവിട്ടെന്ന തരത്തിലുള്ള വ്യാജപ്രചാരണങ്ങൾ സാമൂഹ്യമാധ്യമങ്ങളിലൂടെ പ്രചരിപ്പിക്കരുതെന്നും ജനങ്ങളിൽ അനാവശ്യ ഭീതി സൃഷ്ടിക്കുന്നവർക്കെതിരെ കർശന നടപടി സ്വീകരിക്കുമെന്നും അദ്ദേഹം മുന്നറിയിപ്പ് നൽകി.
ദുരിതബാധിതരെ സുരക്ഷിത കേന്ദ്രങ്ങളിലേക്ക് മാറ്റുന്നതിനായി എൻഡിആർഎഫ് സംഘങ്ങളെ കോട്ടയത്തും പത്തനംതിട്ടയിലും വിന്യസിച്ചിട്ടുണ്ട്. മത്സ്യബന്ധന ബോട്ടുകൾ ചെങ്ങന്നൂരിലെത്തിച്ചിട്ടുണ്ടെന്നും പോലീസും ഫയർഫോഴ്സും പൂർണ സജ്ജമാണെന്നും ദുരിതാശ്വാസ ക്യാമ്പുകളിലേക്കുള്ള ഭക്ഷണപ്പൊതികളും മറ്റ് അടിയന്തര സഹായങ്ങളും ഒരുക്കിയിട്ടുണ്ടെന്നും മുഖ്യമന്ത്രി കൂട്ടിച്ചേർത്തു.
