loginkerala
ന്യൂഡൽഹി: നീറ്റ് പരീക്ഷാ ചോദ്യപ്പേപ്പർ ചോർച്ചയുമായി ബന്ധപ്പെട്ട് ജന്തർ മന്തറിൽ വിവിധ വിദ്യാർഥി-യുവജന സംഘടനകളുടെ നേതൃത്വത്തിൽ പ്രതിഷേധം തുടരുന്നതിനിടെ സുരക്ഷാ ക്രമീകരണങ്ങൾ ശക്തമാക്കി. പ്രതിഷേധങ്ങളുടെ പശ്ചാത്തലത്തിൽ ഡൽഹി മെട്രോ റെയിൽ കോർപറേഷൻ (ഡിഎംആർസി) സുരക്ഷാ മുൻകരുതലിന്റെ ഭാഗമായി നഗരത്തിലെ ചില മെട്രോ സ്റ്റേഷനുകളിൽ താൽക്കാലിക നിയന്ത്രണങ്ങൾ ഏർപ്പെടുത്തി.
പ്രതിഷേധം ശക്തമായ സാഹചര്യത്തിൽ ഡൽഹി പോലീസ് നഗരത്തിന്റെ വിവിധ ഭാഗങ്ങളിൽ കൂടുതൽ സുരക്ഷാ സേനയെ വിന്യസിച്ചിട്ടുണ്ട്. പ്രധാന മേഖലകളിൽ പോലീസിനൊപ്പം അർധസൈനിക വിഭാഗങ്ങളെയും നിയോഗിച്ച് നിയമ-സമാധാന സാഹചര്യം ഉറപ്പാക്കാനുള്ള നടപടികൾ സ്വീകരിച്ചു. പ്രതിഷേധവുമായി ബന്ധപ്പെട്ട സാഹചര്യങ്ങൾ അധികൃതർ നിരീക്ഷിച്ചുവരികയാണ്.
