loginkerala
നിലവിൽ കൊച്ചിയില് മാത്രമാണ് ചെറിയ തോതിലെങ്കിലും കേസുകള് വര്ധിക്കുന്നതെന്നും മന്ത്രി അറിയിച്ചു
തിരുവനന്തപുരം: സംസ്ഥാനത്ത് ആശങ്കപ്പെടേണ്ട കോവിഡ് സാഹചര്യമില്ലെന്നും മറ്റ് സംസ്ഥാനങ്ങളില് കോവിഡ് കേസുകള് കൂടിയ സാഹചര്യത്തില് സംസ്ഥാനം ജാഗ്രത തുടരുമെന്നും ആരോഗ്യമന്ത്രി വീണാ ജോര്ജ്. എല്ലാ ജില്ലകളും പ്രതിരോധ പ്രവര്ത്തനങ്ങള് ഊര്ജിതമാക്കാൻ മന്ത്രി നിർദ്ദേശം നൽകി. നിലവിൽ കൊച്ചിയില് മാത്രമാണ് ചെറിയ തോതിലെങ്കിലും കേസുകള് വര്ധിക്കുന്നതെന്നും മന്ത്രി അറിയിച്ചു.
തുടര്ച്ചയായി അവലോകന യോഗങ്ങള് ചേര്ന്ന് ആവശ്യമായ പ്രവര്ത്തനങ്ങള് നടത്തണം. വാക്സിനേഷൻ സംബന്ധിച്ച് ശക്തമായ ബോധവത്കരണം നടത്തുമെന്ന് ആരോഗ്യ മന്ത്രി വ്യക്തമാക്കി. സംസ്ഥാനത്തെ കോവിഡ് സാഹചര്യം വിലയിരുത്താനായി ചേര്ന്ന ഉന്നതതല യോഗത്തിലാണ് മന്ത്രി നിര്ദേശം നല്കിയത്. നിലവില് സംസ്ഥാനത്ത് ഒരിടത്തും ക്ലസ്റ്റര് രൂപപ്പെട്ടിട്ടില്ല. സംസ്ഥാനത്ത് ഇന്ന് 255 കോവിഡ് കേസുകളാണ് റിപ്പോര്ട്ട് ചെയ്തത്. 325 പേര് രോഗമുക്തി നേടി. ആകെ 1812 പേരാണ് ചികിത്സയിലുള്ളത്. സംസ്ഥാനത്ത് കുറച്ചുനാള് കൂടി കോവിഡ് കേസുകള് ഇങ്ങനെ തുടരും.
കോവിഡ് ബാധിതരുടെ എണ്ണത്തിൽ കാര്യമായ വർധനയില്ലെന്ന് ആരോഗ്യമന്ത്രി അറിയിച്ചു. മാസ്ക് മാറ്റാൻ സമയമായിട്ടില്ലെന്നും ഒരു വലിയ തരംഗം മുന്നില് കാണുന്നില്ലെങ്കിലും ജാഗ്രത തുടരണമെന്നും മന്ത്രി നിര്ദേശം നല്കി. സംസ്ഥാന തലത്തിലും ജില്ലാ തലത്തിലും അവബോധം ശക്തിപ്പെടുത്തും. അടച്ചിട്ട സ്ഥലങ്ങള് രോഗവ്യാപനത്തിന് കാരണമാകും. കോവിഡ് വര്ധിച്ചാല് പ്രായമായവരെ ബാധിക്കാന് സാധ്യതയുള്ളതിനാല് പ്രിക്കോഷന് ഡോസ് നല്കാന് പ്രോത്സാഹിപ്പിക്കണം. വാക്സിനേഷന് പരമാവധി ആളുകളില് എത്തിക്കുമെന്നും വിദ്യാഭ്യാസ വകുപ്പുമായി ആലോചിച്ച് കുട്ടികളുടെ വാക്സിനേഷന് ശക്തിപ്പെടുത്തുമെന്നും മന്ത്രി പറഞ്ഞു.
