loginkerala
തിരുവനന്തപുരം:സാമ്രാജ്യത്വത്തിന്റെ ചങ്ങലക്കെട്ടുകൾ പൊട്ടിച്ചെറിഞ്ഞ് ഇന്ത്യ സ്വാതന്ത്ര്യം നേടിയിട്ട് 79 വർഷം പൂർത്തിയാകുന്ന വേളയിൽ സ്വാതന്ത്ര്യദിനം കേവലം ആഘോഷമായി ചുരുക്കരുതെന്ന് പ്രതിപക്ഷ നേതാവ് പിണറായി വിജയൻ. സമകാലിക ഇന്ത്യയുടെ രാഷ്ട്രീയ-സാമൂഹിക സാഹചര്യങ്ങളെക്കുറിച്ച് ഗൗരവമായ ആത്മപരിശോധന നടത്തണമെന്നും അദ്ദേഹം സ്വാതന്ത്ര്യദിന സന്ദേശത്തിൽ പറഞ്ഞു.
ഭരണഘടന ഉറപ്പുനൽകുന്ന അഭിപ്രായസ്വാതന്ത്ര്യവും ബഹുസ്വരതയും വലിയ വെല്ലുവിളികൾ നേരിടുകയാണ്. ജാതിയുടെയും മതത്തിന്റെയും പേരിൽ ജനങ്ങളെ വിഭജിക്കാനുള്ള ശ്രമങ്ങൾ നടക്കുന്നുണ്ട്. വർഗീയതയ്ക്ക് രാജ്യത്ത് സ്ഥാനമില്ലെന്നും ജനാധിപത്യ-മതനിരപേക്ഷ മൂല്യങ്ങൾ സംരക്ഷിക്കുമെന്നും ഈ സ്വാതന്ത്ര്യദിനത്തിൽ ഉറക്കെ പ്രഖ്യാപിക്കണമെന്നും പിണറായി വിജയൻ പറഞ്ഞു.
തൊഴിലില്ലായ്മ, വിലക്കയറ്റം, വർധിച്ചുവരുന്ന സാമ്പത്തിക അസമത്വം തുടങ്ങിയ അടിസ്ഥാന പ്രശ്നങ്ങൾ പരിഹരിക്കാനും ചൂഷണങ്ങൾക്ക് അറുതിവരുത്താനും സ്വാതന്ത്ര്യസമരത്തിന്റെ ഓർമകൾ കരുത്ത് പകരണമെന്നും അദ്ദേഹം പറഞ്ഞു.
എല്ലാ പൗരന്മാർക്കും തുല്യനീതിയും സ്വാതന്ത്ര്യവും ഉറപ്പാക്കുന്ന മതനിരപേക്ഷ ജനാധിപത്യ ഇന്ത്യയെയാണ് സ്വാതന്ത്ര്യസമര സേനാനികൾ സ്വപ്നം കണ്ടത്. ഭരണഘടനാ ബാഹ്യ ഇടപെടലുകളിൽനിന്ന് ജനാധിപത്യ മൂല്യങ്ങളെ സംരക്ഷിക്കുകയെന്നത് കാലഘട്ടം ആവശ്യപ്പെടുന്ന ഏറ്റവും വലിയ കടമയാണ്. വെറുപ്പിന്റെയും വിദ്വേഷത്തിന്റെയും മതിലുകൾ പൊളിച്ചെറിഞ്ഞ് മാനവികതയും സാഹോദര്യവും നിറഞ്ഞ ഇന്ത്യയെ കെട്ടിപ്പടുക്കാൻ ഒരുമിക്കണമെന്നും പിണറായി വിജയൻ ആഹ്വാനം ചെയ്തു. ഏവർക്കും ഹൃദയം നിറഞ്ഞ സ്വാതന്ത്ര്യദിനാശംസകളും അദ്ദേഹം നേർന്നു.
