loginkerala
ഇടുക്കി ജില്ലക്കാരിയായ റാണി സണ്ണിയുടെ വീടിനു സമീപത്തെ 4.5 ഏക്കർ നിറയെ ഏലത്തോട്ടമാണ്. ഏലത്തോട്ടത്തിൽ നിറയെ പ്ലാവുമുണ്ട്. ഏലത്തോട്ടങ്ങളുടെയും പ്ലാവിന്റെയും പച്ചപ്പിന് നടുവിലാണ് അവർ ജീവിക്കുന്നത്. ഏലം വിളവെടുക്കുമ്പോൾ, തങ്ങൾ നട്ടു വളർത്തിയ പ്ലാവിൽനിന്നും ലക്ഷങ്ങൾ സമ്പാദിക്കാനാകുമെന്ന് റാണി സണ്ണി ഒരിക്കലും വിചാരിച്ചിരുന്നില്ല.
“ഞങ്ങളുടെ പ്രദേശം ഏലം കൃഷിക്ക് പേരുകേട്ടതാണ്, ഈ പ്രദേശത്തെ മറ്റ് കർഷകരെപ്പോലെ, ചെറിയ ഏല മരങ്ങൾക്ക് തണൽ നൽകുന്നതിനായി ഞങ്ങൾ പ്ലാവും വളർത്തി. ഓരോ പ്ലാവിൽനിന്നും 10 മുതൽ 50 വരെ ചക്കകൾ കിട്ടാറുണ്ടായിരുന്നു. പക്ഷേ, അവയുടെ ലാഭസാധ്യതകളെക്കുറിച്ച് അറിവില്ലാതിരുന്നതിനാൽ ഞങ്ങൾ അവ വലിച്ചെറിയുമായിരുന്നു,” റാണി സണ്ണി പറഞ്ഞു.
2017 വരെ ചക്കയുടെ വിപണി മൂല്യത്തെക്കുറിച്ച് റാണി സണ്ണിക്ക് അറിവുണ്ടായിരുന്നില്ല. ഒരു പരിശീലന പരിപാടിയിൽ പങ്കെടുത്ത ശേഷമാണ് ചക്കയിൽനിന്നും തയ്യാറാക്കാവുന്ന ധാരാളം ഉത്പന്നങ്ങളുടെ സാധ്യതകൾ തിരിച്ചറിഞ്ഞത്. ചക്കയുടെ വൈവിധ്യം ഉപയോഗപ്പെടുത്തിക്കൊണ്ട്, റാണി നൂതനമായ നിരവധി ഉത്പന്നങ്ങൾ വികസിപ്പിച്ചെടുത്തു. ഉണക്കിയ ചക്ക, ഉണക്കിയ ചക്കപ്പൊടി, ശീതീകരിച്ച ഇളം ചക്ക, ആരോഗ്യകരമായ ചക്കപ്പൊടി, ഉണക്കിയ ചക്കയുടെ വിത്ത്, ഉണക്കിയ ചക്കയുടെ വിത്ത് പൊടി, ചക്കയുടെ പൾപ്പ് എന്നിവ ഇതിൽ ഉൾപ്പെടുന്നു. പിന്നീട് ഇവ സപ്ലിമെന്റുകൾ, കട്ലറ്റുകൾ, ബർഗർ പാറ്റികൾ എന്നിവ ഉണ്ടാക്കാൻ ഉപയോഗിച്ചു.
അതേ വർഷം തന്നെ, 57 വയസുള്ള റാണി സണ്ണി ‘ഏദൻ ജാക്ക്ഫ്രൂട്ട് പ്രോഡക്റ്റ്സ്’ എന്ന പേരിൽ സ്വന്തം ബിസിനസ് തുടങ്ങി. വീടിനടുത്തുള്ള ഒരു ചെറിയ മുറിയിൽ ആരംഭിച്ച ബിസിനസ് വർഷങ്ങൾക്കുശേഷം വലിയൊരു ബിസിനസ് സ്ഥാപനമായി മാറി. ഇന്ന് റാണി ഒരു വർഷം 8 ലക്ഷം രൂപ ലാഭം നേടുന്നു.
ഉന്നത വിദ്യാഭ്യാസം നേടിയെങ്കിലും, ചെറുപ്പത്തിൽ തന്നെ റാണി ഒരു വീട്ടമ്മയായി മാറി. എന്നിരുന്നാലും, ബിസിനസിനോടും നൂതനാശയങ്ങളോടുമുള്ള അവരുടെ അഭിനിവേശം ഒരിക്കലും മങ്ങിയില്ല. സംസ്ഥാന സർക്കാർ നടപ്പിലാക്കിയ സ്ത്രീ ശാക്തീകരണ പദ്ധതിയായ കുടുംബശ്രീയിൽ നിന്ന് പരിശീലനം നേടിയതോടെ അവരുടെ ഉള്ളിലെ സംരംഭക ഉണർന്നു. ഈ പരിശീലനം അവരുടെ ആശയങ്ങളെ ഒരു ബിസിനസ് സംരംഭമാക്കി മാറ്റുന്നതിനുള്ള അറിവും കഴിവുകളും നൽകി സജ്ജമാക്കി.
ചക്ക ഉത്പന്നങ്ങളിൽ പരീക്ഷണം നടത്തിയ ശേഷം, പ്രാദേശിക ഉദ്യോഗസ്ഥരുടെ പിന്തുണയോടെ പ്രാദേശിക വിപണിയിൽ റാണി സ്ഥാനം ഉറപ്പിച്ചു. തന്റെ ബ്രാൻഡായ ഏദൻ ജാക്ക്ഫ്രൂട്ട് പ്രോഡക്റ്റ്സ് വഴി, ഉയർന്ന നിലവാരമുള്ള ചക്ക അധിഷ്ഠിത ഉൽപ്പന്നങ്ങൾ വിപണിയിലെത്തിക്കുന്നതിനായി റാണി വൈറ്റ് ലേബലിങ് ഉപയോഗിച്ചു. നിലവിൽ, ഒരു വെബ്സൈറ്റ് നിർമ്മിക്കുന്നതിലും സോഷ്യൽ മീഡിയയിൽ ശക്തമായ സാന്നിധ്യം സ്ഥാപിക്കുന്നതിലുമാണ് അവർ ശ്രദ്ധ കേന്ദ്രീകരിക്കുന്നത്.
ബിസിനസുകൾ നടത്തുന്നതിൽ സ്ത്രീകളെ പലപ്പോഴും കുറച്ചുകാണുന്ന ഒരു സമൂഹത്തിൽ, പ്രതിരോധശേഷിയുടെയും സംരംഭക മികവിന്റെയും തിളക്കമാർന്ന ഉദാഹരണമായി റാണി നിലകൊള്ളുന്നു. ഒരു വീട്ടമ്മയിൽ നിന്ന് വിജയകരമായ സംരംഭകയിലേക്കുള്ള അവരുടെ യാത്ര നിശ്ചയദാർഢ്യത്തിന്റെയും കഠിനാധ്വാനത്തിന്റെയും തെളിവാണ്.
