loginkerala
കൊല്ലം: കൊല്ലത്ത് മത്സ്യത്തൊഴിലാളിയെ കായലിൽ വീണ് കാണാതായി. കെട്ടിയിട്ടിരുന്ന മത്സ്യബന്ധന ബോട്ടിൽ നിന്ന് കായലിലേക്ക് വീണാണ് തിരുവനന്തപുരം പാറശ്ശാല സ്വദേശി കിരണിനെ കാണാതായത്. ഇന്നലെ രാത്രി 10 മണിയോടെയായിരുന്നു അപകടം. ഒരു ബോട്ടിൽ നിന്ന് മറ്റൊരു ബോട്ടിലേക്ക് കയറുന്നതിനിടെയാണ് കിരൺ കായലിൽ വീണത്. ഫയർ ആൻഡ് റെസ്ക്യൂ സേനയുടെ സ്കൂബ സംഘം സ്ഥലത്തെത്തി തിരച്ചിൽ നടത്തുകയാണ്. അതേസമയം, വിഴിഞ്ഞത്തും മുതലപ്പൊഴിയിലും കടലിൽ കാണാതായ മത്സ്യത്തൊഴിലാളികളുടെ വീടുകളിൽ ആഭ്യന്തര മന്ത്രി രമേശ് ചെന്നിത്തലയും ഫിഷറീസ് മന്ത്രി അബ്ദുൽ ഗഫൂറും സന്ദർശനം നടത്തി. തിരച്ചിൽ വൈകുന്നതിൽ തീരദേശവാസികളുടെ കടുത്ത പ്രതിഷേധം തുടരുന്നതിനിടെയാണ് മന്ത്രിമാരുടെ സന്ദർശനം.
പ്രതീക്ഷ കൈവിട്ടിട്ടില്ലെന്നും തിരച്ചിൽ ശക്തമായി തുടരുമെന്നും ആഭ്യന്തര മന്ത്രി വ്യക്തമാക്കി. കടലിൽ ആളുകളെ കാണാതാകുന്ന സാഹചര്യത്തിൽ തിരച്ചിൽ നടത്തുന്നതിനായി പ്രത്യേക മാർഗരേഖ ഉടൻ പുറത്തിറക്കുമെന്നും മുന്നറിയിപ്പ് സംവിധാനം കൂടുതൽ കാര്യക്ഷമമാക്കുമെന്നും ഫിഷറീസ് മന്ത്രി അറിയിച്ചു.
