loginkerala
ന്യൂഡൽഹി: കേന്ദ്ര വിദ്യാഭ്യാസമന്ത്രി ധർമേന്ദ്ര പ്രധാൻ രാജിവെക്കണമെന്നാവശ്യപ്പെട്ട് നിരാഹാര സമരം നടത്തുന്ന സാമൂഹ്യപ്രവർത്തകൻ സോനം വാങ്ചുക്കിനെ സ്വകാര്യ ആശുപത്രിയിലേക്ക് മാറ്റാൻ ഡൽഹി ഹൈക്കോടതി ഉത്തരവിട്ടു.
സോനം വാങ്ചുക്കിനെ ഏത് സ്വകാര്യ ആശുപത്രിയിലേക്കും മാറ്റുന്നതിൽ കേന്ദ്രസർക്കാരിന് എതിർപ്പില്ലെന്ന് കോടതിയെ അറിയിച്ചിരുന്നു. ഇതിന്റെ അടിസ്ഥാനത്തിലാണ് അദ്ദേഹത്തെ മേദാന്ത ആശുപത്രിയിലേക്ക് മാറ്റാനുള്ള നടപടികൾക്ക് കോടതി അനുമതി നൽകിയത്.
കോടതി ഉത്തരവിന് പിന്നാലെ സോനം വാങ്ചുക്കിന്റെ ഭാര്യ ഗീതാഞ്ജലി ആംഗ്മോ കോടതിയോട് നന്ദി രേഖപ്പെടുത്തി. ആരോഗ്യനിലയെക്കുറിച്ചുള്ള ആശങ്കകൾ കോടതിയുടെ ശ്രദ്ധയിൽപ്പെടുത്തിയതും ഇവരായിരുന്നു.
ആരോഗ്യനില മോശമായതിനെ തുടർന്ന് കഴിഞ്ഞ ദിവസം സമരവേദിയിൽ നിന്ന് പൊലീസ് സോനം വാങ്ചുക്കിനെ ബലമായി മാറ്റി സഫ്ദർജംഗ് ആശുപത്രിയിൽ പ്രവേശിപ്പിച്ചിരുന്നു. തുടർചികിത്സയ്ക്കായി സ്വകാര്യ ആശുപത്രിയിലേക്ക് മാറ്റണമെന്ന ആവശ്യമാണ് പിന്നീട് ഹൈക്കോടതി അംഗീകരിച്ചത്.
സോനം വാങ്ചുക്കിന്റെ ആരോഗ്യനിലയും ചികിത്സയും സംബന്ധിച്ച വിവരങ്ങൾ നിരീക്ഷിച്ചുവരികയാണെന്നും ബന്ധപ്പെട്ട അധികൃതർ അറിയിച്ചു.
