loginkerala
തിരുവനന്തപുരം: വിഴിഞ്ഞം അന്താരാഷ്ട്ര തുറമുഖവുമായി ബന്ധപ്പെട്ട് അദാനി പോർട്ട്സിൽ നിന്ന് എംഎസ്സിയിലേക്കുള്ള ഓഹരി കൈമാറ്റം സംസ്ഥാന സർക്കാരിന്റെ അറിവോടെയാണെന്ന് പ്രതിപക്ഷ നേതാവ് പിണറായി വിജയൻ ആരോപിച്ചു. സംസ്ഥാന സർക്കാരിന്റെ മുൻകൂർ അനുമതിയോടെ മാത്രമേ ഇത്തരമൊരു നടപടി സ്വീകരിക്കാൻ കഴിയൂ എന്നിരിക്കെ, അദാനി കമ്പനിക്ക് ഇത്ര ധൈര്യത്തോടെ മുന്നോട്ട് പോകാൻ എങ്ങനെ കഴിഞ്ഞുവെന്ന കാര്യത്തിൽ വ്യക്തത വേണമെന്നും അദ്ദേഹം ആവശ്യപ്പെട്ടു.
25 ശതമാനത്തിലധികം ഓഹരി കൈമാറ്റം നടക്കുകയാണെങ്കിൽ സംസ്ഥാന സർക്കാരിനെ മുൻകൂട്ടി അറിയിക്കണമെന്നാണ് കരാറിലെ വ്യവസ്ഥയെന്ന് പിണറായി ചൂണ്ടിക്കാട്ടി. അദാനിയുടെ നടപടിയെക്കുറിച്ച് മുഖ്യമന്ത്രി നിലപാട് വ്യക്തമാക്കണമെന്നും അദ്ദേഹം ആവശ്യപ്പെട്ടു.
അദാനി പോർട്ട്സ് സെബിക്ക് സമർപ്പിച്ച രേഖകളിൽ ഓഹരി കൈമാറ്റം ജൂൺ 29-ന് പൂർത്തിയായതായി വ്യക്തമാക്കിയിട്ടുണ്ടെന്നും പിണറായി പറഞ്ഞു. കേരളത്തിന്റെ താത്പര്യങ്ങൾക്ക് വിരുദ്ധമായ നടപടിയാണിതെന്നും, വിഴിഞ്ഞം തുറമുഖം പുതിയ ഉടമസ്ഥതയിലേക്ക് മാറുന്നതിനുള്ള ആദ്യപടിയായാണ് ഇതിനെ കാണുന്നതെന്നും അദ്ദേഹം ആരോപിച്ചു.
ഷിപ്പിംഗ് കമ്പനിയായ എംഎസ്സിക്ക് വിഴിഞ്ഞം തുറമുഖത്തിന്റെ നിയന്ത്രണം ലഭിക്കുന്ന സാഹചര്യമുണ്ടായാൽ അത് കുത്തകയ്ക്ക് വഴിവെക്കുമെന്നും അദ്ദേഹം അഭിപ്രായപ്പെട്ടു. അത്തരമൊരു സാഹചര്യം ഉണ്ടായാൽ മറ്റ് ഷിപ്പിംഗ് കമ്പനികളുടെ കപ്പലുകൾ വിഴിഞ്ഞത്തേക്ക് എത്തുന്നതിന് തടസ്സമുണ്ടാകാനും സംസ്ഥാനത്തിന് ലഭിക്കേണ്ട വരുമാനത്തെ ബാധിക്കാനും സാധ്യതയുണ്ടെന്നും പിണറായി വിജയൻ പറഞ്ഞു.
