loginkerala
തിരുവനന്തപുരം: ശബരിമല സ്വർണക്കൊള്ളയുമായി ബന്ധപ്പെട്ട വിവാദങ്ങൾ തുടരുന്നതിനിടെ മുൻ ദേവസ്വം മന്ത്രിയും സി.പി.എം നേതാവുമായ കടകംപള്ളി സുരേന്ദ്രൻ അന്നത്തെ ആഭ്യന്തരമന്ത്രി രമേശ് ചെന്നിത്തലയുടെ വീട്ടിൽ നടത്തിയ സന്ദർശനം രാഷ്ട്രീയ വൃത്തങ്ങളിൽ ചർച്ചയായി.
കരിക്കകത്തെ വീട്ടിൽ നിന്ന് സുഹൃത്തിനൊപ്പം സ്കൂട്ടറിൽ എത്തിയ കടകംപള്ളി സുരേന്ദ്രൻ ഇന്നലെ രാവിലെ ഏഴരയോടെയാണ് വഴുതക്കാട്ടെ രമേശ് ചെന്നിത്തലയുടെ വസതിയിലെത്തിയത്. ഇരുവരും തമ്മിലുള്ള കൂടിക്കാഴ്ച ഏകദേശം പത്ത് മിനിറ്റ് നീണ്ടു.
സുഹൃത്തിന് ആഭ്യന്തരമന്ത്രിയെ കാണേണ്ട ആവശ്യമാണ് ഉണ്ടായിരുന്നതെന്നും അതിനാലാണ് താൻ ഒപ്പമെത്തിയതെന്നും കടകംപള്ളി സുരേന്ദ്രൻ വിശദീകരിച്ചു. കൂടിക്കാഴ്ചയിൽ മറ്റ് വിഷയങ്ങളൊന്നും ചർച്ച ചെയ്തിട്ടില്ലെന്നും അദ്ദേഹം പറഞ്ഞു. മന്ത്രി നിയമസഭയിലേക്ക് പോകുന്നതിന് മുമ്പ് കാണാനാണ് രാവിലെ എത്തിയത്. കാറിന്റെ ഡ്രൈവർ വൈകിയതിനാലാണ് സ്കൂട്ടർ ഉപയോഗിച്ചതെന്നും, സ്കൂട്ടറിൽ യാത്ര ചെയ്യുന്നത് തന്റെ പതിവാണെന്നും അദ്ദേഹം കൂട്ടിച്ചേർത്തു.
അതേസമയം, മന്ത്രിയുടെ വീട്ടിൽ നിന്ന് മടങ്ങുമ്പോൾ ഹെൽമറ്റ് ധരിക്കാതെ സ്കൂട്ടർ ഓടിച്ചതും വിവാദമായി. സംഭവത്തിൽ നടപടി ആവശ്യപ്പെട്ട് യൂത്ത് കോൺഗ്രസ് നേതാവ് അമ്പലമുക്ക് രഞ്ജിത്ത് ട്രാൻസ്പോർട്ട് കമ്മിഷണർക്ക് പരാതി നൽകി.
ഇതിന് പ്രതികരിച്ച കടകംപള്ളി സുരേന്ദ്രൻ, മന്ത്രിയുടെ വീട്ടിലെത്തുമ്പോൾ ഹെൽമറ്റ് ധരിച്ചിരുന്നുവെന്നും മടങ്ങുമ്പോൾ സ്കൂട്ടറിന്റെ സീറ്റിനടിയിൽ സൂക്ഷിച്ചിരുന്ന ഹെൽമറ്റ് ധരിക്കാൻ മറന്നുപോയതാണെന്നും പറഞ്ഞു. നിയമലംഘനത്തിന് പിഴയടയ്ക്കാൻ തയ്യാറാണെന്നും അദ്ദേഹം വ്യക്തമാക്കി.
