ധാക്ക: ഇന്ത്യയിൽ അഭയം തേടിയ മുൻ ബംഗ്ലാദേശ് പ്രധാനമന്ത്രി ഷെയ്ഖ് ഹസീനക്ക് എതിരായ കേസുകളിൽ ധാക്കയിലെ പ്രത്യേക ട്രിബ്യുണൽ ഇന്ന് വിധി പറയും. ഗുരുതരമായമനുഷ്യാവകാശ ലംഘനങ്ങളുമായി ബന്ധപ്പെട്ട കേസിൽ ഹസീനക്ക് ജയിൽശിക്ഷയോ വധശിക്ഷയോ ലഭിക്കാൻ സാധ്യതയുണ്ട്. ബംഗ്ലദേശ് ഇന്റർനാഷണൽ ക്രൈംസ് ട്രൈബ്യൂണലിന്റെ വിധിയാണ് ഇന്നുണ്ടാകുക.
ഷെയ്ഖ് ഹസീനയുടെ ആഭ്യന്തര മന്ത്രിയായിരുന്ന അസദുസ്സമാൻ ഖാൻ കമൽ, മുൻ പൊലീസ് ഇൻസ്പെക്ടർ ജനറൽ ചൗധരി അബ്ദുല്ല അൽ മാമുൻ എന്നിവർക്കെതിരെയും ഇന്ന് വിധി പറയും.കഴിഞ്ഞ വർഷം ജൂലൈ 15 നും ഓഗസ്റ്റ് 15 നും ഇടയിൽ നടന്ന പ്രക്ഷോഭങ്ങളെ അടിച്ചമർത്താൻ ഹസീനയുടെ സർക്കാർ കൊലപാതകം, വധശ്രമം, പീഡനം, തുടങ്ങിയ മനുഷ്യത്വരഹിതമായ പ്രവൃത്തികൾ നടത്തിയെന്ന കുറ്റമാണ് ചുമത്തിയിരിക്കുന്നത്.
കേസിൽ വിധി പറയുന്ന സാഹചര്യത്തിൽ തെരുവിലിറങ്ങി പ്രതിഷേധിക്കാൻ ഒരുങ്ങുകയാണ് ഷെയ്ഖ് ഹസീനയുടെ പാർട്ടിയായ അവാമി ലീഗ്. എന്നാൽ തെരുവിൽ ഇറങ്ങുന്നവരെ നേരിടുമെന്ന് ബംഗ്ലദേശിലെ മുഹമ്മദ് യൂനുസിന്റെ നേതൃത്വത്തിലുള്ള ഇടക്കാല സർക്കാരും പ്രഖ്യാപിച്ചിട്ടുണ്ട്. ഇന്ത്യയിൽ തുടരുന്ന ഹസീനയെ കൈമാറണമെന്ന ആവശ്യം ശക്തമാക്കാനും ഇടയുണ്ട്.
1996 മുതൽ 2001 വരെയും 2009 മുതൽ 2024 വരെ പ്രധാനമന്ത്രിയായി സേവനമനുഷ്ഠിച്ച ഷെയ്ഖ് ഹസീന വാസദ് ലോകത്തിലെ ഏറ്റവും കൂടുതൽ കാലം രാജ്യതലപ്പത്തിരുന്ന വനിതയുമാണ്. 2024 ജൂണിൽ ‘സ്റ്റുഡന്റ്സ് എഗൈൻസ്റ്റ് ഡിസ്ക്രിമിനേഷൻ’ എന്ന സംഘടനയുടെ നേതൃത്വത്തിൽ വിദ്യാർത്ഥികൾ സർക്കാർ ജോലികളിലെ അന്യായമായ ക്വാട്ടകൾക്കെതിരെ പ്രതിഷേധമാരംഭിച്ചു. ആദ്യം, പ്രതിഷേധങ്ങൾ സമാധാനപരമായിരുന്നെങ്കിലും ജൂലൈ അവസാനത്തോടെ സർക്കാർ പ്രതിഷേധക്കാർക്കെതിരെ അടിച്ചമർത്താൻ ശ്രമിച്ചു. അവരിൽ പലരും കൊല്ലപ്പെട്ടു. ഈ ദാരുണമായ സംഭവം ‘ജൂലൈ കൂട്ടക്കൊല’ എന്നറിയപ്പെടുന്ന ഈ സംഭവത്തിലാണ് ഇപ്പോൾ ഹസീന നിയമനടപടി നേരിടുന്നത്.
പ്രക്ഷോഭം നിയന്ത്രണാതീതമായതോടെ ഹസീന രാജ്യം വിട്ട് ഇന്ത്യയിൽ അഭയം പ്രാപിച്ചിരുന്നു. തുടർന്നാണ് സമാധാനത്തിനുള്ള നോബൽ സമ്മാനം നേടിയ സാമ്പത്തിക ശാസ്ത്രജ്ഞനായ മുഹമ്മദ് യൂനുസിന്റെ നേതൃത്വത്തിൽ ഒരു ഇടക്കാല സർക്കാർ ബംഗ്ലാദേശിൽ നിലവിൽ വന്നത്.
