എം.എ യൂസഫലിക്ക് വേറിട്ട പിറന്നാൾ സമ്മാനമൊരുക്കി വിദ്യാർത്ഥി കൂട്ടായ്മ; ജീവകാരുണ്യത്തിന്റെ വഴിയെ സ്വന്തം സ്കൂളിലെ കുട്ടികളും

• ലെമർ പബ്ലിക്ക് സ്കൂളിലെ മൂന്ന് ജീവനക്കാർക്ക് വിദ്യാർത്ഥി കൂട്ടായ്മ വീടൊരുക്കും

തൃശൂർ: ജീവകാരുണ്യ പ്രവർത്തനങ്ങളിലുടെ മലയാളികളുടെ മനസ് കീഴടക്കിയ ലുലു ഗ്രൂപ്പ് ചെയർമാൻ എം.എ യൂസഫലിക്ക് വേറിട്ട പിറന്നാൾ സമ്മാനമൊരുക്കി തന്റെ ട്രസ്റ്റിലുള്ള സ്കൂളിലെ വിദ്യാർത്ഥി കൂട്ടായ്മ. നാട്ടിക ലെമർ പബ്ലിക്ക് സ്കൂളിലെ വിദ്യാർത്ഥി കൂട്ടായ്മയാണ് സ്കൂൾ സ്ഥാപകനായ എം.എ യൂസഫലിയുടെ വഴി തന്നെ തിരഞ്ഞെടുത്തത്. എല്ലാവർഷവും യൂസഫലിയുടെ ജന്മദിനമായ നവംബർ 15ന് സദ്യയോടെയുള്ള വിപുലമായ ആഘോഷപരിപാടികളും കലാപരിപാടികളുമാണ് നടത്താറുള്ളത്. എന്നാൽ ഇക്കുറി സ്കൂൾ സ്ഥാപകന്റെ ജന്മദിനം വേറിട്ടതാക്കാമെന്ന് വിദ്യാർത്ഥികളും സ്കൂൾ മാനേജ്മെന്റും തീരുമാനമെടുക്കുകകയായിരിന്നു. ഇതോടെ സ്കൂളിലെ തന്നെ കിടപ്പാടമില്ലാതെ ബുദ്ധിമുട്ടുന്ന മൂന്ന് ജീവനക്കാരെ കണ്ടെത്തി അവർക്ക് വീട് വച്ചുനൽകാനുള്ള തീരുമാനത്തിലെത്തി.

വിവിധ പരിപാടികളിലൂടെ വിദ്യാർത്ഥി ക്ലബ് വഴി കുട്ടികൾ തന്നെ ശേഖരിച്ച തുകയാണ് ഈ സത്കർമ്മത്തിനായി അവർ മാറ്റി വച്ചത്. കുട്ടികളുടെ ഈ പ്രയത്നത്തിന് എല്ലാ പിന്തുണയും നൽകി അധ്യാപകരും സ്കൂൾ മാനേജ്മെന്റും ഒപ്പം കൂടി. നാട്ടിക സ്വദേശികളായ സ്കൂൾ ജീവനക്കാരായ അംബിക, രചിത, രത്നവല്ലി എന്നിർക്കാണ് കൊച്ചു കൂട്ടുകാർ വീടൊരുക്കുന്നത്. ഇതിൽ ഒരാൾക്ക് വീട് പൂർണമായും നിർമ്മിച്ച് നൽകുമെന്നും ഭാഗീകമായി നിർമ്മാണം പൂർത്തിയാക്കിയ രണ്ട് വീടുകളുടെ തുടർനിർമ്മാണം ഏറ്റെടുക്കുമെന്നും സ്കൂൾ അധികൃതർ അറിയിച്ചു. ശിശുദിനത്തിന്റെയും സ്കൂൾ സ്ഥാപകനും ലുലുഗ്രൂപ്പ് ചെയർമാനുമായ എം.എ യൂസഫലിയുടെ പിറന്നാളിനോട് അനുബന്ധിച്ച് നടന്ന ആഘോഷപരിപാടികളിലായിരുന്നു പ്രഖ്യാപനം. ആഘോഷപരിപാടികൾ ഗാനരചയിതാവും കഥാകൃത്തുമായ എം.ഡി രാജേന്ദ്രൻ ഉദ്ഘാടനം ചെയ്തു. മനുഷ്യസ്നേഹപരമായ ഇടപടലിന് എടുത്തുകാട്ടാൻ പറ്റിയ ആൾരൂപമാണ് എം.എ യൂസഫലിയെന്ന് അദ്ദേഹം പ്രസംഗിച്ചു. ആഘോഷപരിപാടികളിൽ പെർസ്പെക്ടീവ് ട്രസ്റ്റ് സെക്രട്ടറി കെ.കെ. അബ്ദുൾ ലത്തീഫ്, ട്രഷറർ ഇ.എ ഹാരീസ്, മാനേജർ മുഹമ്മദ് അലി,ലെമർ പബ്ലിക്ക് സ്കൂൾ പ്രിൻസിപ്പൽ ഗൈനി മൈക്കിൾ തുടങ്ങിയവർ പ്രസംഗിച്ചു.

പടം അടിക്കുറിപ്പ്:

നാട്ടിക ലെമർ പബ്ലിക്ക് സ്കൂളിലെ ശിശുദിന ആഘോഷവും സ്കൂൾ സ്ഥാപകനായ എം.എ യൂസഫലിയുടെ ജന്മദിന ആഘോഷവും ഗാനരചയിതാവും കഥാകൃത്തുമായ എം.ഡി രാജേന്ദ്രൻ ഉദ്ഘാടനം ചെയ്യുന്നു. പെർസ്പെക്ടീവ് ട്രസ്റ്റ് സെക്രട്ടറി കെ.കെ. അബ്ദുൾ ലത്തീഫ്, ട്രഷറർ ഇ.എ ഹാരീസ്, മാനേജർ മുഹമ്മദ് അലി,ലെമർ പബ്ലിക്ക് സ്കൂൾ പ്രിൻസിപ്പൽ ഗൈനി മൈക്കിൾ തുടങ്ങിയവർ സമീപം.