പശ്ചിമേഷ്യ സംഘർഷത്തെ തുടർന്ന് മോഹൻലാൽ ജീത്തു ജോസഫ് ചിത്രം ദൃശ്യം 3യുടെ റിലീസ് മാറ്റാൻ ആലോചന. ഏപ്രിൽ 2ന് ലോകവ്യാപകമായി റിലീസ് നിശ്ചയിച്ച ചിത്രം മേയ് അവസാനമോ ജൂൺ ആദ്യമോ പ്രദർശത്തിന് എത്തിക്കാനാണ് നീക്കം.
ദൃശ്യം 3യുടെ ലോകമെമ്പാടുമുള്ള തിയേറ്റർ, ഡിജിറ്റൽ അവകാശങ്ങൾ പനോരമ സ്റ്റുഡിയോസും പെൻ സ്റ്റുഡിയോസും ചേർന്ന് സ്വന്തമാക്കിയിരുന്നു. ഇന്ത്യൻ സിനിമയിലെ തന്നെ ഏറ്റവും സ്വാധീനമുള്ളതും ആഘോഷിക്കപ്പെടുന്നതുമായ സിനിമാറ്റിക് ഫ്രാഞ്ചൈസികളിൽ ഒന്നാണ് ‘ദൃശ്യം’. പനോരമ സ്റ്റുഡിയോസും പെൻ സ്റ്റുഡിയോസും ഒന്നിക്കുന്നതോടെ, മലയാളത്തിന്റെ സ്വന്തം ദൃശ്യം 3 അർഹിക്കുന്ന രീതിയിൽ പ്രേക്ഷകരിലേക്ക് എത്തിക്കാനാണ് ലക്ഷ്യമിടുന്നത് .എന്നാൽ ഇപ്പോഴത്തെ സാഹചര്യത്തിൽ അതിന് കഴിയാത്ത സ്ഥിതിയാണ്.
മോഹൻലാൽ ജീത്തു ജോസഫ് കൂട്ടുകെട്ടിൽ ഒരുങ്ങുന്ന ദൃശ്യം 3 ആരാധക ലോകത്ത് വൻപ്രതീക്ഷ നൽകുന്നുണ്ട്. ദൃശ്യം ഫ്രാഞ്ചൈസിയിലെ അവസാന ചിത്രം ആയിരിക്കും ദൃശ്യം 3 എന്ന് ജീത്തു ജോസഫ് വ്യക്തമാക്കിയിട്ടുണ്ട്. ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂർ ആണ് നിർമ്മാണം.
