കുസാറ്റ് മാതൃക ആര്ത്തവാവധി എല്ലാ സര്വ്വകലാശാലകളിലും നടപ്പാക്കുന്നത് പരിഗണനയില്; മന്ത്രി ആര് ബിന്ദു
തിരുവനന്തപുരം: കൊച്ചി ശാസ്ത്ര സാങ്കേതിക സര്വ്വകലാശാലയില് നടപ്പാക്കിയ ആര്ത്തവാവധി സംസ്ഥാനത്തെ എല്ലാ സര്വ്വകലാശാലകളിലും നടപ്പാക്കുന്നത് പരിഗണിക്കുമെന്ന് മന്ത്രി ഡോ ആര് ബിന്ദു. കുസാറ്റ് മാതൃകയാണ് സംസ്ഥാന വ്യാപകമാക്കാന് പരിഗണിക്കുന്നതെന്നും മന്ത്രി പറഞ്ഞു. എസ്എഫ്ഐ നേതൃത്വം നല്കുന്ന വിദ്യാര്ത്ഥി യൂണിയന്റെ ആവശ്യപ്രകാരമാണ് കുസാറ്റില് ആര്ത്തവാവധി നല്കാന് തീരുമാനിച്ചത്.
ആര്ത്തവസമയത്ത് വിദ്യാര്ത്ഥിനികള് അനുഭവിക്കുന്ന മാനസിക - ശാരീരിക ബുദ്ധിമുട്ടുകള് കണക്കിലെടുത്താണ് അവധി വ്യാപിപ്പിക്കാനുള്ള തീരുമാനം എടുക്കുന്നതെന്നും മന്ത്രി പറഞ്ഞു. വിദ്യാര്ത്ഥികള്ക്ക് ഓരോ സെമസ്റ്ററിലും പരീക്ഷയെഴുതാന് 75 ശതമാനം ഹാജരാണ് വേണ്ടത്. എന്നാല് ആര്ത്തവാവധി പരിഗണിച്ച് വിദ്യാര്ത്ഥിനികള്ക്ക് 73 ശതമാനം ഹാജരുണ്ടായാലും പരീക്ഷയെഴുതാം എന്ന ഭേദഗതിയാണ് കൊച്ചി ശാസ്ത്ര സാങ്കേതിക സര്വ്വകലാശാല കൊണ്ടുവന്നത്.