ലോകം ഖത്തറിന്റെ മണ്ണിലേക്ക്; ഫിഫ ലോകകപ്പ് വിജയികളെ കാത്തിരിക്കുന്ന സമ്മാനത്തുക

ഡോ. അൻഷാദ് നാസറുദ്ധീൻ 

2022 ഫിഫ ലോകകപ്പ് ആറ് ദിവസം മാത്രം അകലെ നവംബർ 20ന് ഖത്തറിൽ ആരംഭിക്കാനിരിക്കെ ലോകമെമ്പാടുമുള്ള ഫുട്ബോൾ പ്രേമികൾ അന്ത്യഘട്ട ഒരുക്കത്തിലാണ്. നാല് വർഷം കൂടുമ്പോൾ മാത്രം ഫിഫ സംഘടിപ്പിക്കുന്ന ടൂർണമെന്റിന്റെ 22-ാം പതിപ്പും ഒരു അറബ് രാജ്യം ആതിഥേയത്വം വഹിക്കുന്ന ആദ്യത്തേതുമാണ് ഖത്തറിലെ ലോകകപ്പ്. അന്താരാഷ്‌ട്ര ഫുട്‌ബോളിലെ തന്നെ ഏറ്റവും വിലപിടിപ്പുള്ള സമ്മാനത്തുകയാണ് ഫിഫ ലോകകപ്പ് വിജയികൾക്ക് ലഭിക്കുന്നത്. നവംബർ 20ന് തുടങ്ങുന്ന ലോകകപ്പ് മത്സരങ്ങൾ നാല് ആഴ്ച നീണ്ടു നിൽക്കുന്ന ഗ്രൂപ്പ് ഘട്ട മത്സരങ്ങളും നോക്ക് ഔട്ട് മത്സരങ്ങളും കഴിഞ്ഞു ഫൈനൽ ഡിസംബർ 18ന് ലുസൈൽ സ്റ്റേഡിയത്തിൽ വെച്ചു നടക്കുമ്പോൾ ലോക ഫുട്ബോൾ പ്രേമികൾ കാത്തിരിക്കുന്നത് ആ നിമിഷത്തിനു വേണ്ടിയായിരിക്കും! ഏതു രാജ്യം ആയിരിക്കും ഖത്തർ ലോകകപ്പിൽ മുത്തമിടാൻ പോകുന്നത് എന്ന്!!! അതേസമയം റഷ്യയിൽ നടന്ന 2018 ലോകകപ്പിൽ വിജയികളായ ഫ്രാൻസ് തങ്ങളുടെ മൂന്നാം കിരീടം ലക്ഷ്യം വെച്ചായിരിക്കും ഖത്തറിൽ കാലു കുത്തുക.

ഖത്തർ ലോകകപ്പിന് ആതിഥേയത്വം വഹിക്കാൻ ഒരുങ്ങുന്ന സ്റ്റേഡിയങ്ങൾ 

ആകെ എട്ട് സ്റ്റേഡിയങ്ങളാണ് ഖത്തറിൽ നടക്കുന്ന ഫിഫ ലോകകപ്പിൽ ഉപയോഗിക്കുന്നത്. 

⦿ അൽ ബൈത്ത് സ്റ്റേഡിയം - (ശേഷി: 60,000) വടക്കൻ നഗരമായ അൽ ഖോറിലെ സ്റ്റേഡിയത്തിൽ ഗ്രൂപ്പ് ഘട്ടം മുതൽ സെമി ഫൈനൽ വരെയുള്ള മത്സരങ്ങൾ നടക്കും. നാടോടികളായ ആളുകൾ ചരിത്രപരമായി ഉപയോഗിച്ചിരുന്ന കൂടാരങ്ങളിൽ നിന്നാണ് ഈ പേര് വന്നത്.

⦿ ലുസൈൽ സ്റ്റേഡിയം - (ശേഷി: 80,000) ലോകകപ്പ് ആതിഥേയത്വം വഹിക്കാൻ പോകുന്ന എട്ട് സ്റ്റേഡിയങ്ങളിൽ ഏറ്റവും വലിയ സ്റ്റേഡിയം ആണ് ലുസൈൽ സ്റ്റേഡിയം. ഖത്തറി തലസ്ഥാനമായ ദോഹയിൽ നിന്ന് 20 കിലോമീറ്റർ വടക്ക് ലുസൈലിലാണ് 2002 ലോകകപ്പിന്റെ ഷോപീസ് സ്റ്റേഡിയം സ്ഥിതി ചെയ്യുന്നത്. ഡിസംബർ 18ന് നടക്കുന്ന ഫൈനൽ ഉൾപ്പെടെ ലോകകപ്പിന്റെ എല്ലാ ഘട്ടങ്ങളിലും ലുസൈൽ സ്റ്റേഡിയം ഉപയോഗിക്കും. പരമ്പരാഗത ഫാനർ വിളക്കിനെ പ്രതിനിധീകരിക്കുന്ന 'വെളിച്ചത്തിന്റെയും നിഴലിന്റെയും ഇടപെടലിൽ നിന്ന് പ്രചോദനം ഉൾക്കൊണ്ടതാണ്' ഡിസൈൻ. 

⦿ അഹമ്മദ് ബിൻ അലി സ്റ്റേഡിയം - (ശേഷി: 40,000) 2020 ഡിസംബർ 18-ന് തുറന്ന അൽ റയ്യാനിലെ സ്റ്റേഡിയം ഗ്രൂപ്പ് ഘട്ടങ്ങൾ മുതൽ റൗണ്ട് ഓഫ് 16 വരെയുള്ള മത്സരങ്ങൾക്കായി ഉപയോഗിക്കും. ഖത്തറി സംസ്‌കാരത്തിന്റെ പ്രതീകങ്ങൾ ഉൾക്കൊള്ളുന്ന രൂപകല്പനയാണ്.

⦿ അൽ ജനൂബ് സ്റ്റേഡിയം - (ശേഷി: 40,000) തെക്ക് നഗരമായ അൽ വക്രയിലെ സ്റ്റേഡിയം 2019 മെയ് മാസത്തിൽ ഉദ്ഘാടനം ചെയ്തു. ഗ്രൂപ്പ് ഘട്ടങ്ങൾ മുതൽ റൗണ്ട് ഓഫ് 16 വരെയുള്ള മത്സരങ്ങൾ ഇവിടെ നടക്കും. പരമ്പരാഗത ധോ ബോട്ടുകളിൽ നിന്ന് പ്രചോദനം ഉൾക്കൊണ്ടാണ് ഡിസൈൻ.

⦿ അൽ തുമാമ സ്റ്റേഡിയം - (ശേഷി: 40,000) ദോഹയിൽ നിന്ന് 2 കിലോമീറ്റർ തെക്ക് സ്ഥിതി ചെയ്യുന്ന സ്റ്റേഡിയം ഗ്രൂപ്പ് ഘട്ടങ്ങൾ മുതൽ ക്വാർട്ടർ ഫൈനൽ വരെ വേദിയാകും. മിഡിൽ ഈസ്റ്റേൺ രാജ്യങ്ങളിലെ പുരുഷന്മാർ ധരിക്കുന്ന പരമ്പരാഗത തൊപ്പിയായ ഗഹ്ഫിയയെയാണ് ഡിസൈൻ പ്രതിനിധീകരിക്കുന്നത്.

⦿ എജ്യുക്കേഷൻ സിറ്റി സ്റ്റേഡിയം - (ശേഷി: 40,000) ദോഹ സിറ്റി സെന്ററിൽ നിന്ന് 7 കിലോമീറ്റർ അകലെ സ്ഥിതി ചെയ്യുന്ന സ്റ്റേഡിയത്തിൽ ഗ്രൂപ്പ് ഘട്ടം മുതൽ ക്വാർട്ടർ ഫൈനൽ വരെയുള്ള മത്സരങ്ങൾ നടക്കും. ആൾക്കൂട്ടത്തിന്റെ സുഖം ഉറപ്പാക്കാൻ ഇത് നൂതന കൂളിംഗ് സാങ്കേതികവിദ്യ ഉപയോഗിക്കുന്നു. റോഡ് അല്ലെങ്കിൽ മെട്രോ വഴി വേഗത്തിൽ സ്റ്റേഡിയത്തിൽ എത്താൻ സാധിക്കും.

⦿ ഖലീഫ ഇന്റർനാഷണൽ സ്റ്റേഡിയം - (ശേഷി: 45,400) 1976-ൽ ഉദ്ഘാടനം ചെയ്ത് പിന്നീട് നവീകരിച്ച അൽ റയ്യാനിലെ സ്റ്റേഡിയം ഗ്രൂപ്പ് സ്റ്റേജുകൾക്കും 16-ാം റൗണ്ട് മത്സരത്തിനും മൂന്നാം സ്ഥാനത്തിനുള്ള പ്ലേഓഫിനും ഉപയോഗിക്കും. IAAF ലോക അത്‌ലറ്റിക് ചാമ്പ്യൻഷിപ്പിന് പുറമെ അറബ് കപ്പ്, ഫിഫ ക്ലബ് ലോകകപ്പ് മത്സരങ്ങൾക്കായും ഇത് ഉപയോഗിച്ചു.

⦿ സ്റ്റേഡിയം 974 - (ശേഷി: 40,000) ദോഹയിലെ വെസ്റ്റ് ബേയ്‌ക്ക് എതിർവശത്തുള്ള സ്റ്റേഡിയത്തിന് ഖത്തറിന്റെ ഡയലിംഗ് കോഡിൽ നിന്നാണ് (+974) പേര് ലഭിച്ചത്. 974 ഷിപ്പിംഗ് കണ്ടെയ്‌നറുകളിൽ നിന്ന് നിർമ്മിച്ച ഈ സ്റ്റേഡിയത്തിൽ ഗ്രൂപ്പ് ഘട്ടങ്ങൾ മുതൽ റൗണ്ട് ഓഫ് 16 വരെയുള്ള മത്സരങ്ങൾ നടക്കും.

ഖത്തറിൽ എത്ര ടീമുകളാണ് ഫിഫ ലോകകപ്പ് കളിക്കുന്നത് ?

32 ടീമുകൾ എട്ട് ഗ്രൂപ്പുകളായി മത്സരിക്കും, ഇതിൽ ഓരോ ഗ്രൂപ്പിലും നാല് ടീമുകളാണുള്ളത്. 

⦿ഗ്രൂപ്പ് എ: ഖത്തർ, ഇക്വഡോർ, സെനഗൽ, നെതർലൻഡ്‌സ്
⦿ഗ്രൂപ്പ് ബി: ഇംഗ്ലണ്ട്, ഇറാൻ, യുഎസ്എ, വെയിൽസ്
⦿ഗ്രൂപ്പ് സി: അർജന്റീന, സൗദി അറേബ്യ, മെക്സിക്കോ, പോളണ്ട്
⦿ഗ്രൂപ്പ് ഡി: ഫ്രാൻസ്, ഓസ്ട്രേലിയ, ഡെൻമാർക്ക്, ടുണീഷ്യ
⦿ഗ്രൂപ്പ് ഇ: സ്പെയിൻ, കോസ്റ്റാറിക്ക, ജർമ്മനി, ജപ്പാൻ
⦿ഗ്രൂപ്പ് എഫ്: ബെൽജിയം, കാനഡ, മൊറോക്കോ, ക്രൊയേഷ്യ
⦿ഗ്രൂപ്പ് ജി: ബ്രസീൽ, സെർബിയ, സ്വിറ്റ്സർലൻഡ്, കാമറൂൺ
⦿ഗ്രൂപ്പ് എച്ച്: പോർച്ചുഗൽ, ഘാന, ഉറുഗ്വേ, ദക്ഷിണ കൊറിയ

ഖത്തർ ലോകകപ്പിന്റെ സമ്മാനത്തുക

⦿ ഖത്തർ ലോകകപ്പ് വിജയിക്ക് ലഭിക്കാൻ പോകുന്നത് 38 ദശലക്ഷം യൂറോ അതായത് (344 കോടി രൂപ) ആയിരിക്കും. റണ്ണറപ്പിന് 27.27 ദശലക്ഷം യൂറോ (245 കോടി രൂപ) ലഭിക്കുമ്പോൾ മൂന്നാം സ്ഥാനത്തെത്തുന്ന ടീമിന് 24.45 ദശലക്ഷം യൂറോ (220 കോടി രൂപ) ലഭിക്കും.

ഖത്തർ ലോകകപ്പിന്റെ ഭാഗ്യചിഹ്നം

ഖത്തർ ലോകകപ്പിന്റെ ഔദ്യോഗിക ചിഹ്നം അല്ലെങ്കിൽ ഭാഗ്യ ചിഹ്നം എന്ന് പറയുന്നത് 'ലയീബ്' ആണ്. സാഹസികവും രസകരവും കൗതുകകരവുമായ ലയീബ് ഏപ്രിൽ 1ന് ദോഹയിൽ നടന്ന ഖത്തർ 2022 ഫൈനൽ ഡ്രോയിലാണ് അനാവരണം ചെയ്തത്. അറബ് പുരുഷന്മാർ ധരിക്കുന്ന പരമ്പരാഗത ശിരോവസ്ത്രമായ കെഫിയയിൽ നിന്ന് പ്രചോദനം ഉൾക്കൊണ്ടതാണിത്. നൂറുകണക്കിന് ഫുട്ബോൾ താരങ്ങൾ രാജ്യത്ത് ഇറങ്ങാൻ പോകുന്നതിന്റെ പ്രതീക്ഷയിൽ അറബിയിൽ 'ലയീബ്' എന്നത് 'സൂപ്പർ സ്കിൽഡ് പ്ലെയർ’ എന്നാണ് വിവർത്തനം ചെയ്യുന്നത്. ഒരു കഷണം വസ്ത്രം കൊണ്ടാണ് ഇത് നിർമ്മിച്ചിരിക്കുന്നത് എന്നതും പ്രത്യേകതയാണ്.

ഫിഫ ലോകകപ്പിന്റെ ഇന്ത്യയിലെ തത്സമയ സംപ്രേക്ഷണ അവകാശം

2022 ഫിഫ ലോകകപ്പിന്റെ സംപ്രേക്ഷണാവകാശം ഇന്ത്യയിലെ വയാകോം നെറ്റ്‌വർക്ക് 18 സ്വന്തമാക്കിയിരുന്നു. അതിനാൽ, ഖത്തർ 2022 ലെ എല്ലാ മത്സരങ്ങളും Sports18, Sports18 HD എന്നിവയിൽ തത്സമയം സംപ്രേക്ഷണം ചെയ്യും. അതേസമയം ആൻഡ്രോയിഡിലും iOS-ലും, 2022 ഫിഫ ലോകകപ്പ് ജിയോസിനിമയിലൂടെ തത്സമയം സ്ട്രീം ചെയ്യും. ലോകകപ്പ് മത്സരങ്ങളുടെ സമയക്രമം നോക്കുകയാണെങ്കിൽ നാല് ടൈം സ്ലോട്ടുകൾ ആയിരിക്കും ഉണ്ടായിരിക്കുക - 3:30 PM, 6:30 PM, 9:30 PM, 12:30 AM. എന്നാൽ നോക്കൗട്ട് മത്സരങ്ങൾ രാത്രി 8.30ന് ആരംഭിക്കും.