മണിപ്പൂരിൽ സംഘർഷം തുടരുന്നു; മൂന്ന് സന്നദ്ധ പ്രവർത്തകരെ വെടി വെച്ച് കൊന്നു

ഇംഫാല്‍ - കലാപം തുടരുന്ന മണിപ്പൂരിൽ മൂന്ന് സന്നദ്ധ പ്രവർത്തകരെ അക്രമികൾ വെടി വെച്ചു കൊന്നു. ബിഷ്ണുപൂര്‍ ജില്ലയിലെ ഖോയ്ജുമന്തബി ഗ്രാമത്തിലാണ് ആക്രമണമുണ്ടായത്. അജ്ഞാതരായ തോക്കുധാരികളുടെ വെടിവയ്പില്‍ മൂന്ന് ഗ്രാമ സന്നദ്ധപ്രവര്‍ത്തകരാണ് കൊല്ലപ്പെട്ടത്. താല്‍ക്കാലിക ബങ്കറില്‍ കാവല്‍നില്‍ക്കുകയായിരുന്നു ഇവര്‍. വെടിവെപ്പില്‍ മറ്റ് അഞ്ച് പേര്‍ക്കും പരിക്കേറ്റിരുന്നു. പരിക്കേറ്റ രണ്ട് പേരുടെ നില ഗുരുതരമാണെന്നും ഇവരെ ഇംഫാലിലെ ആശുപത്രിയിലേക്ക് മാറ്റിയതായും പോലീസ് അറിയിച്ചു.