മാറ്റങ്ങൾ ഉൾക്കൊണ്ട്‌ മുന്നേറിയാലേ വിദ്യാഭ്യാസ രംഗത്ത് മുന്നേറ്റം ഉണ്ടാവും ; ശശി തരൂർ
കൊച്ചി : എറണാകുളം നിയോജകമണ്ഡലത്തിൽ എസ്.എസ്.എൽ.സി പ്ലസ്ടു പരീക്ഷകളിൽ മുഴുവൻ വിഷയങ്ങൾക്കും A പ്ലസ് ഗ്രേഡുകൾ കരസ്‌ഥമാക്കിയ വിദ്യാർത്ഥികളെ അനുമോദിച്ചു. ചടങ്ങ് ശശി തരൂർ എം.പി ഉദ്ഘാടനം ചെയ്തു. കാലഘട്ടത്തിനു അനുസൃതമായി വിദ്യാഭ്യാസ രംഗത്ത് മാറ്റങ്ങൾ അനിവാര്യമാണെന്നും, ഒരു കാലഘട്ടത്തിൽ മെഡിക്കൽ ട്രാൻസ്ക്രിപ്ഷൻ ഒരു തലമുറയുടെ ഇടയിൽ വളരെ അധികം ചലനം സൃഷ്ട്ടിച്ച തൊഴിൽ ആയിരുന്നെങ്കിൽ പിന്നീട് വോയിസ്‌ ട്രാൻസ്ക്രിപ്ഷൻ ആർട്ടിഫിഷൽ ഇന്റലിജിൻസ് എന്നി ടെക്നോളജികൾ വന്നതോടെ മെഡിക്കൽ ട്രാൻസ്ക്രിപ്ഷൻ പോലെയുള്ള ജോലികളുടെ പ്രാധാന്യം കുറഞ്ഞത് പോലെ ഇന്ന് നിലവിലുള്ള പല തൊഴിലും തൊഴിൽ സാധ്യതകളും 2030 ഓടെ ഇല്ലാതെയാവും. ഇത് പോലെ ടെക്നോളജിയിലെ മാറ്റങ്ങൾ സമൂഹത്തിൽ ഉണ്ടാക്കുന്ന മാറ്റങ്ങൾ ഉൾക്കൊണ്ട്‌ വിദ്യാഭ്യാസ രംഗം മുന്നേറിയാലേ ലോകത്തിനു അഭിമാനിക്കാവുന്ന ഒരു തലമുറയെ വാർത്തെടുക്കാനാകുവെന്ന് ഉദ്ഘാടന പ്രസംഗത്തിൽ ശശി തരൂർ പറഞ്ഞു.ടി.ജെ.വിനോദ് എം.എൽ.എ അധ്യക്ഷത വഹിച്ചു. ഹൈബി ഈഡൻ എം.പി, മേയർ അഡ്വ. അനിൽകുമാർ, ജില്ല കളക്ടർ എൻ.എസ്.കെ ഉമേഷ്‌ ഐ.എ.എസ്, ഡോ.ജോസ് ചാക്കോ പെരിയാപുരം, റവ.സിസ്റ്റർ വിനീത, കെ.ജി.രാജേഷ്, ബി.ജെ. അലക്സാണ്ടർ, മനു ജേകബ് എന്നിവർ പ്രസംഗിച്ചു.
മാജിഷ്യൻ സാമ്രാജ് മാജിക് ഷോ അവതരിപ്പിച്ചു. എഡിസൺ ഫ്രാൻസ്, അവിനാഷ് കുളൂർ എന്നിവരുടെ മോട്ടിവേഷൻ ക്ലാസ്സുകളും മികവ് 2023 നോട്‌ അനുബന്ധിച്ചു നടന്നു.
എറണാകുളം നിയോജക മണ്ഡലത്തിലും സമീപ പ്രദേശങ്ങളിലുമായി 1500 ഓളം വിദ്യാർത്ഥികൾ പങ്കെടുത്തു.
മികച്ച വിജയം കൈവരിച്ച സ്‌കൂളുകൾക്കുള്ള ട്രോഫിയും ചടങ്ങിൽ ശശി തരൂർ എം.പി വിതരണം ചെയ്തു.