സമത്വവും സൗഹാര്ദ്ദവും പുരോഗതിയും പുലരുന്ന പുതുവര്ഷത്തെ കുറിച്ചുള്ള പ്രതീക്ഷകള്; ന്യൂയര് ആശംസ നേര്ന്ന് മുഖ്യമന്ത്രിയും ഗവര്ണറും
തിരുവനന്തപുരം: ഗവര്ണര് ആരിഫ് മുഹമ്മദ് ഖാനും മുഖ്യമന്ത്രി പിണറായി വിജയനും കേരളീയര്ക്ക് പുതുവത്സരാശംസകള് നേര്ന്നു. കേരളത്തിന്റെ വികസനത്തിനായി ആശയങ്ങളിലും പ്രവര്ത്തനത്തിലുമുള്ള നമ്മുടെ ഒത്തൊരുമയെ ദൃഢപ്പെടുത്തി സംസ്ഥാനത്തെ എല്ലാവര്ക്കും സമൃദ്ധിയും നീതിയും ക്ഷേമവും ഉറപ്പാക്കാന് സാധിക്കുന്ന വര്ഷമാവട്ടെ പുതുവര്ഷമെന്ന് ഗവര്ണര് ആശംസാ സന്ദേശത്തില് പറഞ്ഞു.
സമത്വവും സൗഹാര്ദ്ദവും പുരോഗതിയും പുലരുന്ന പുതുവര്ഷത്തെ കുറിച്ചുള്ള പ്രതീക്ഷകള് നമുക്ക് ഈ വേളയില് പങ്കുവെയ്ക്കാമെന്ന് മുഖ്യമന്ത്രി പിണറായി വിജയന് ആശംസാ സന്ദേശത്തില് വ്യക്തമാക്കി. ഐക്യവും സമാധാനവും നിലനില്ക്കുന്ന നാടാണ് നമ്മുടേത് . അതിന് ഭംഗംവരുത്താന് ശ്രമിക്കുന്ന പ്രതിലോമ ശക്തികളെ കൂട്ടായി ഒറ്റപ്പെടുത്തേണ്ടതുണ്ട്. അതിനായി കൂടുതല് കരുത്തോടെ ഒരുമിച്ച് നീങ്ങാം മുഖ്യമന്ത്രി പറഞ്ഞു.
കോവിഡിന്റെ പുതിയ വകഭേദം ഭീഷണി ഉയര്ത്തി മുന്നിലുണ്ട്. ഈ വകഭേദത്തിന് വലിയ വ്യാപനശേഷി ഉണ്ടെന്നാണ് പഠനങ്ങള് സൂചിപ്പിക്കുന്നത്. പുതുവര്ഷത്തെ വരവേല്ക്കുന്നതിനായുള്ള ആഘോഷങ്ങള്ക്കിടയിലും രോഗപ്പകര്ച്ച ഉണ്ടാവാതിരിക്കാനുള്ള ജാഗ്രത ഏവരും പുലര്ത്തണം.കരുതലോടെ നമുക്ക് ആഘോഷങ്ങളില് പങ്കുചേരാം. ഏവര്ക്കും പുതുവത്സരാശംസകള് നേരുന്നുവെന്നും മുഖ്യമന്ത്രി പറഞ്ഞു.