പൊലീസ് ചമഞ്ഞ് തട്ടിപ്പ്; യുവാവ് പിടിയില്
Jan 26, 2023, 09:43 IST
തൃശ്ശൂര്: പൊലീസ് ചമഞ്ഞ് തട്ടിപ്പ് നടത്തിയ യുവാവിനെ പിടികൂടി. തൃശ്ശൂര് തളിക്കുളം കച്ചേരിപ്പടി സ്വദേശി പ്രണവിനെയാണ് അന്തിക്കാട് പൊലീസ് അറസ്റ്റ് ചെയ്തത്. കഴിഞ്ഞ ഡിസംബര് 30 നാണ് സംഭവം നടന്നത്.
മണലൂര് പുത്തന്കുളം സ്വദേശി നീരജ് കൂട്ടുകാരായ അതുല്, ആദര്ശ്, എന്നിവരും ചേര്ന്ന് സ്കൂട്ടറില് വരുന്നതിനിടയില് പാന്തോട് സെന്ററില് വെച്ച് മോട്ടോര് സൈക്കിളില് വന്ന പ്രതി പോലീസാണെന്ന് പറഞ്ഞ് മൂവരെയും തടഞ്ഞു നിര്ത്തി. തുടര്ന്ന് കഞ്ചാവ് പരിശോധന നടത്തുകയും ആദര്ശിന്റെ മുഖത്തടിക്കുകയും ചെയ്തു.
പിന്നീട് മൂവരെയുംകൂട്ടി ഇവരുടെ തന്നെ മറ്റൊരു കൂട്ടുകാരനായ ആഷിന്റെ അന്തിക്കാട്ടുള്ള വീട്ടിലേക്ക് പോയി. അവിടെവെച്ച് നാലുപേരെയും കഞ്ചാവ് ഉള്പ്പടെ വിവിധ കേസുകളില് ഉള്പ്പെടുത്തുമെന്ന് ഭീഷണിപ്പെടുത്തി 30,000 രൂപ കൈക്കലാക്കുകയായിരുന്നു.