പോസ്റ്റ്മോര്ട്ടത്തിന് മുമ്പുള്ള നിര്ബന്ധിത കോവിഡ് പരിശോധന ഒഴിവാക്കി; ആരോഗ്യ മന്ത്രി വീണ ജോര്ജ്
Jan 25, 2023, 16:06 IST
തിരുവനന്തപൂരം: പോസ്റ്റ്മോര്ട്ടത്തിന് മുമ്പുള്ള നിര്ബന്ധിത കോവിഡ് പരിശോധന ഒഴിവാക്കിയെന്ന് ആരോഗ്യ മന്ത്രി വീണ ജോര്ജ്. കോവിഡ് കേസുകള് കുറഞ്ഞു വരുന്ന സാഹചര്യത്തിലാണ് നടപടി. സംസ്ഥാനത്ത് കോവിഡ് കേസുകള് കുറഞ്ഞതോടെ ഡെഡ് ബോഡി മാനേജ്മെന്റ് മാര്ഗനിര്ദേശങ്ങള് പുതുക്കിയതായും ആരോഗ്യ മന്ത്രി അറിയിച്ചു.
ഇനിമുതല് പോസ്റ്റ്മോര്ട്ടത്തിന് മുമ്പുള്ള നിര്ബന്ധിത കോവിഡ് പരിശോധന ഒഴിവാക്കി. മരണപ്പെട്ട കേസില് കോവിഡ് ആണെന്ന് ശക്തമായ ക്ലിനിക്കല് സംശയം തോന്നിയാല് റാപ്പിഡ് ആന്റിജന് ടെസ്റ്റ് നടത്തിയാല് മതി. പോസ്റ്റ്മോര്ട്ടം സമയത്ത് എല്ലാ ആരോഗ്യ പ്രവര്ത്തകരും പിപിഇ കിറ്റ്, എന് 95 മാസ്ക്, രണ്ട് ഗ്ലൗസ്, ഫേസ് ഷീല്ഡ് തുടങ്ങിയ സ്റ്റാന്ഡേര്ഡ് സുരക്ഷാ മുന്കരുതലുകള് സ്വീകരിക്കേണ്ടതാണെന്നും മന്ത്രി പറഞ്ഞു.