ലോകാരോഗ്യ സംഘടനയുടെ എക്സിക്യൂട്ടീവ് ബോർഡിൽ യുഎസ് പ്രതിനിധിയായി ഇന്ത്യൻ വംശജൻ ഡോ. വിവേക് മൂർത്തി
പ്രസിഡന്റ് ബരാക് ഒബാമയുടെ കീഴിൽ 19-ാമത്തെ സർജൻ ജനറലായി അദ്ദേഹം മുമ്പ് സേവനമനുഷ്ഠിച്ചിരുന്നു
വാഷിംഗ്ടൺ : ലോകാരോഗ്യ സംഘടനയുടെ എക്സിക്യൂട്ടീവ് ബോർഡിൽ അമേരിക്കയുടെ പ്രതിനിധിയായി പ്രവർത്തിക്കാൻ വിവേക് മൂർത്തിയെ അമേരിക്കൻ പ്രസിഡന്റ് ജോ ബൈഡൻ നാമനിർദ്ദേശം ചെയ്തു. നിലവിൽ യുഎസ് സർജൻ ജനറലായി തുടരുന്ന 45കാരനായ ഡോ മൂർത്തി തന്റെ ചുമതലകൾക്കൊപ്പം പുതിയ സ്ഥാനത്തും പ്രവർത്തിക്കുമെന്ന് വൈറ്റ് ഹൗസ് പ്രസ്താവനയിൽ അറിയിച്ചു.
2021 മാർച്ചിലാണ് രാജ്യത്തിന്റെ 21-ാമത്തെ സർജൻ ജനറലായി പ്രവർത്തിക്കാൻ യുഎസ് സെനറ്റ് അദ്ദേഹത്തെ നിയമിച്ചത്. പ്രസിഡന്റ് ബരാക് ഒബാമയുടെ കീഴിൽ 19-ാമത്തെ സർജൻ ജനറലായി അദ്ദേഹം മുമ്പ് സേവനമനുഷ്ഠിച്ചിരുന്നു. രാഷ്ട്രത്തിന്റെ ഡോക്ടർ എന്ന നിലയിൽ, പൊതുജനങ്ങൾക്ക് വ്യക്തവും സ്ഥിരവും നീതിയുക്തവുമായ മാർഗ്ഗനിർദ്ദേശങ്ങളും നൽകുന്നതിന് ലഭ്യമായ ഏറ്റവും മികച്ച ശാസ്ത്രീയ വിവരങ്ങളെ ആശ്രയിച്ച് ആരോഗ്യകരമായ ഒരു രാജ്യത്തിന് അടിത്തറയിടാൻ സഹായിക്കുക എന്നതാണ് സർജൻ ജനറലിന്റെ ദൗത്യം.
21-ാമത്തെ സർജൻ ജനറലായി സേവനമനുഷ്ഠിക്കുമ്പോൾ ആരോഗ്യ മേഖലയിലെ തെറ്റായ വിവരങ്ങളുടെ വ്യാപനം, യുവാക്കളുടെ മാനസികാരോഗ്യ പ്രതിസന്ധി, ക്ഷേമം എന്നിവയുൾപ്പെടെ നിരവധി നിർണായക പൊതുജനാരോഗ്യ പ്രശ്‌നങ്ങൾ പരിഹരിക്കുന്നതിന് സർക്കാരിലുടനീളം ശ്രദ്ധ ആകർഷിക്കുന്നതിലും പ്രവർത്തിക്കുന്നതിലും ഡോ മൂർത്തി ശ്രദ്ധ കേന്ദ്രീകരിച്ചു.
ഇന്ത്യൻ വംശജനായ ആദ്യത്തെ സർജൻ ജനറലായ ഡോ. മൂർത്തി മിയാമിയിലാണ് വളർന്നത് .ഹാർവാർഡ്, യേൽ സ്കൂൾ ഓഫ് മെഡിസിൻ, യേൽ സ്കൂൾ ഓഫ് മാനേജ്‌മെന്റ് എന്നിവിടങ്ങളിൽ നിന്നാണ് അദേഹം ബിരുദം നേടിയത്. പ്രശസ്ത ഫിസിഷ്യനും ഗവേഷണ ശാസ്ത്രജ്ഞനും സംരംഭകനും എഴുത്തുകാരനുംകൂടിയാണ് അദ്ദേഹം. ഡോ. ആലിസ് ചെന്നാണ് ഭാര്യ. രണ്ട് കുട്ടികളുമായി വാഷിംഗ്ടൺ ഡിസിയിലാണ് വിവേക് മൂർത്തി താമസിക്കുന്നത്.