കോവിഡ് കാലത്ത് ഒഴിവാക്കേണ്ടതും ചെയ്യേണ്ടതുമായ 5 കാര്യങ്ങള്
കോവിഡ് മഹാമാരിയുടെ കാലത്ത് ആഹാരം ഔഷധമാകണം എന്ന തിരിച്ചറിവ് നമ്മൾക്കുണ്ടാവണം. രോഗപ്രതിരോധ ശേഷി കൂട്ടാനുള്ള ഭക്ഷണശീലങ്ങളാണ് ഈ ലോക്ക് ഡൗൺ ദിവസങ്ങളിൽ നമ്മൾ ശീലിക്കേണ്ടത്. മഹാമാരിയെ തടയാൻ മാത്രമല്ല മറ്റുള്ള അസുഖങ്ങളെ ചെറുക്കാനും ഇത്തരത്തിലുള്ള ശീലങ്ങൾ വളരെയധികം സഹായിക്കും.
ഒരാളുടെ ശരീരത്തിൽ രോഗപ്രതിരോധശേഷി കുറയുമ്പോൾ, കൊറോണ വൈറസ് ആക്രമിക്കാൻ ഇടയാകും. ഭക്ഷണക്രമത്തിലും ജീവിതചര്യയിലും ചില മാറ്റങ്ങൾ വരുത്തിയാൽ ഒരു പരിധി വരെ പ്രതിരോധശേഷി വർധിപ്പിക്കാം.
ശരീരത്തിന്റെ രോഗപ്രതിരോധശേഷി മെച്ചപ്പെടുത്തുവാന് ശ്രദ്ധിക്കേണ്ട കുറച്ച് കാര്യങ്ങള് ഇതാ.
നിർബന്ധമായും ഒഴിവാക്കേണ്ട 5 കാര്യങ്ങൾ:
1 – സോഫ്റ്റ് ഡ്രിങ്ക്‌സ് ഒഴിവാക്കുക. ഇവയുടെ ദീർഘകാല ഉപയോഗം ഫാറ്റി ലിവർ പോലെയുള്ള കരൾ രോഗങ്ങൾക്കും പൊണ്ണത്തടിക്കും അസ്ഥിക്ഷയത്തിനുമൊക്കെ കാരണമാകും.
2 – മദ്യം പൂർണമായി ഒഴിവാക്കുക. ഇത് ആരോഗ്യം തകർക്കുക മാത്രമല്ല മരണം പെട്ടെന്നാക്കും. മദ്യം കഴിച്ചാൽ കോറോണോ വൈറസ് ബാധയെ മറികടക്കാൻ കഴിയുമെന്നു പറയുന്നത് അസംബന്ധമാണ്.
3 – പഞ്ചസാരയുടെ അമിത ഉപയോഗം ആരോഗ്യത്തിന് അത്ര നല്ലതല്ല. പ്രമേഹം, പൊണ്ണത്തടിഎന്നിവയൊക്കെ അമിതമായ പഞ്ചസാരയുടെ ഉപയോഗം കൊണ്ടു സംഭവിക്കുന്ന പ്രശ്‌നങ്ങളാണ്. കഴിവതും പഞ്ചസാര കഴിക്കുന്നത് ഈ കാലയളവിൽ ഒഴിവാക്കുക.
4 – മാനസിക സമ്മർദ്ദം കുറക്കുക. മനസ്സിന് ആരോഗ്യമുണ്ടെങ്കിലേ ശരീരത്തിനും ആരോഗ്യമുണ്ടാവുകയുള്ളൂ. ആരോഗ്യമുള്ള ശരീരത്തിനുള്ളിലൊരു ആരോഗ്യമുള്ള മനസ്സാണ് ഏവർക്കും ആവശ്യം. എല്ലായ്‌പ്പോഴും സന്തോഷവാനായിരിക്കുക. യോഗാഭ്യാസവും ശ്വസന വ്യായാമങ്ങളും സ്ഥിരമായി ചെയ്യുന്നത് മനസ്സിന് ഏറെ കരുത്ത് നല്‍കും.
5 – പുകവലി ശരീരത്തിന്റെ പ്രതിരോധ ശേഷി കുറക്കുമെന്നതിനാൽ നിർബന്ധമായും ഉപേക്ഷിക്കുക. ഒരു വർഷത്തിൽ പുകവലി കൊണ്ട് മാത്രം ലോകത്ത് 8 മില്യൺ ആളുകളാണ് മരിക്കുന്നത്.
നിർബന്ധമായും ചെയ്യേണ്ട 5 കാര്യങ്ങൾ:
1 – വെള്ളം ധാരാളം കുടിക്കുക. ശരീരത്തിലെ വിഷത്തിന്റെ അംശങ്ങൾ പുറന്തള്ളാൻ വെള്ളത്തിന് കഴിയും . ഓരോ 25 കിലോ തൂക്കത്തിനും ഒരു ലിറ്റർ വെള്ളം കുടിക്കുക. ഉദാ: 75 കിലോ ഉള്ള വ്യക്‌തിയാണെങ്കിൽ 3 ലിറ്റർവെള്ളമാണ് ഒരു ദിവസം കുടിക്കേണ്ടത്. വെള്ളം രോഗപ്രതിരോധശേഷി വർധിപ്പിക്കാനും ഉൻമേഷവാനായിരിക്കാനും വെള്ളം സഹായിക്കുന്നു.
2 – ആന്‍റി ഓക്സിഡന്‍സ് (Anti oxidants) & വിറ്റമിൻസ് (Vitamins) ധാരാളമടങ്ങിയ പഴങ്ങളും പച്ചക്കറികളും ശീലമാക്കണം. രോഗബാധകളെ ചെറുക്കാനും ഉന്മേഷമുണ്ടാവാനും ഇത് സാഹായിക്കും.
3 – വ്യായാമം ശീലമാക്കുക. ഏത്‌ പ്രായത്തിലുള്ളവരാണെങ്കിലും പതിവായി വ്യായാമം ചെയ്യുന്നെങ്കിൽ മാത്രമേ നല്ല ആരോഗ്യംനിലനിറുത്താനാകുകയുള്ളൂ. ആഴ്ചയിൽ അഞ്ചു ദിവസമെങ്കിലും 30 മിനിറ്റ് വ്യായാമം ചെയ്യുക.
4 – മതിയായ ഉറക്കം. ഉറക്കമില്ലാത്ത അവസ്ഥ നമ്മുടെ മനസ്സിനെയും ശരീരത്തെയും ഒരുപോലെ തളര്‍ത്തുന്ന ഒന്നാണ്. ഉറങ്ങാത്തവര്‍ തങ്ങളുടെ ആരോഗ്യം തന്നെയാണ് ഇല്ലാതെ ആക്കുന്നത്. എത്രമാത്രം ഉറക്കംവേണമെന്നത്‌ ഒരോ വ്യക്തിയെയും അനുസരിച്ച് വ്യത്യാസപ്പെട്ടിരിക്കും. നവജാത ശിശുക്കൾദിവസവും 16-18 മണിക്കൂർ ഉറങ്ങുമ്പോൾ 1-4 വയസ്സുള്ള കുട്ടികൾ 11-ഓ 12-ഓ മണിക്കൂറുംഉറങ്ങേണ്ടത്‌ ആവശ്യമാണ്‌. സ്‌കൂളിൽ പോകുന്ന കുട്ടികൾ 10 മണിക്കൂറും കൗമാരത്തിലുള്ളവർ ഒൻപതോ പത്തോ മണിക്കൂറും പ്രായപൂർത്തിയായവർ ഏഴ്, എട്ട് മണിക്കൂറും ഉറങ്ങേണ്ടതാണ്‌.
5 – സമീകൃതാഹാരം: ശരീരത്തിന് വേണ്ട എല്ലാ പോഷകഘടകങ്ങളും ആവശ്യമായ അളവിൽ അടങ്ങിയിരിക്കുന്ന ആഹാരമാണ് സമീകൃതാഹാരം. ശരീരത്തിന്റെ സാധാരണ നിലയിലുള്ള വളർച്ചയ്ക്ക് ആവശ്യമായ ധാന്യകം, കൊഴുപ്പ്, മാംസ്യം, ധാതുക്കൾ, വൈറ്റമിനുകൾ എന്നിവ അടങ്ങിയ ആഹാരം ആണ് നാം കഴിക്കേണ്ടത്.
പ്രത്യേകം ശ്രദ്ധിക്കേണ്ടത്: കൈകൾ നല്ലതുപോലെ കഴുകുക. ശുചിത്വക്കുറവ് മൂലം പിടിപെടാന്‍ സാധ്യതയുള്ള അസുഖങ്ങളെ അകറ്റിനിര്‍ത്താന്‍ ഈ ശീലംപ്രധാനമാണ്. രോഗം വരാതിരിക്കാനും അത്‌ പകരാതിരിക്കാനും ഉള്ള ഏറ്റവും നല്ല വഴികളിൽഒന്നാണ്‌ കൈകൾ കഴുകുന്നത്‌. പരമാവധി ജനത്തിരക്കിൽ നിന്നും ഒഴിഞ്ഞു നിൽക്കുക. പുറത്തുപോകുമ്പോൾ നിർബന്ധമായും മാസ്ക്ക് ധരിക്കുക.
പരസ്യങ്ങളിൽ കാണുന്ന രോഗപ്രതിരോധ ശക്തിയുണ്ടാക്കുന്ന മരുന്നുകളേക്കാൾ ഇത്തരത്തിലുള്ള ആരോഗ്യപരിപാലനം ഗുണം ചെയ്യും.
വിവരങ്ങൾക്ക് കടപ്പാട്; ഡോ.ഡാനിഷ് സലിം.