കൊറോണ പ്രതിസന്ധി: പ്രവാസി ക്ഷേമത്തിന് വിവരശേഖരണ പോര്‍ട്ടൽ തുടങ്ങാൻ കേരളം
തിരുവനന്തപുരം: കൊവിഡ് പ്രതിസന്ധിക്കിടെ നാട്ടിലേക്ക് മടങ്ങിയെത്തുന്ന പ്രവാസികളുടെ സംരക്ഷണം ഉറപ്പാക്കാൻ നടപടികൾ സ്വീകരിക്കുമെന്ന് വ്യവസായ മന്ത്രി ഇപി ജയരാജൻ. മടങ്ങി വരുന്ന പ്രവാസികൾക്ക് സാമ്പത്തിക സഹായം അടക്കം ലഭ്യമാക്കേണ്ടതുണ്ടെന്നും കേന്ദ്ര പാക്കേജിൽ പ്രവാസികളുടെ ക്ഷേമത്തിന് വേണ്ടത്ര പരിഗണനയില്ലാത്ത സാഹചര്യമാണ് ഉള്ളതെന്നും പറഞ്ഞ മന്ത്രി പ്രവാസി ക്ഷേമത്തിന് ഫലപ്രദമായ ബദൽ പരിപാടികൾ ആവിഷ്കരിക്കാനാണ് സംസ്ഥാന സര്ക്കാർ ലക്ഷ്യമിടുന്നതെന്നും വ്യക്തമാക്കി.
പ്രവാസികളുടെ ക്ഷേമത്തിനായി നിരവധി പദ്ധതികൾ സർക്കാർ നടപ്പിലാക്കി വരുന്നുണ്ടെന്നും ഈ പ്രവർത്തനങ്ങൾക്ക് വേണ്ടി വ്യവസായ വകുപ്പ് ഒരു പോർട്ടൽ തയ്യാറാക്കുകയാണെന്നും ഇപി ജയരാജൻ പറഞ്ഞു. വിവര ശേഖരണത്തിന്‍റെ പോർട്ടലിലെ വിവരങ്ങളിലൂടെ വ്യവസായ വകുപ്പിന്‍റെ സംരംഭങ്ങളിൽ അവരെ കൂടെ ഉൾപെടുത്താൻ കഴിയുമെന്നും അദ്ദേഹം ചൂണ്ടിക്കാട്ടി.
വ്യവസായ വകുപ്പിന്‍റെ www.industry.kerala.gov.in എന്ന വെബ് സൈറ്റിലൂടെ പ്രവാസികളുടെ വിവരശേഖരണം നടത്തുക. ഇതിലൂടെ അവരവരുടെ നൈപുണ്യം മനസിലാക്കി അതിനു അനുസൃതമായി വ്യവസായ സ്ഥാപനങ്ങൾ ആരംഭിക്കാനാകും അതിനുള്ള സൗകര്യവും വ്യവസായ വകുപ്പ് ഒരുക്കുമെന്ന് മന്ത്രി വ്യക്തമാക്കി.
ഇത്തരത്തിൽ രജിസ്റ്റർ ചെയ്യുന്നതിലൂടെ മറ്റ് സംരംഭകരുടെ സംരംഭങ്ങളിലും ഇവർക്കു ജോലി നേടാനാവുമെന്നും ഇപി ജയരാജൻ പറഞ്ഞു. തിരിച്ചു വരുന്നവരുടെ തുടർന്നുള്ള ജീവിതം മെച്ചപ്പെടുത്തി എടുക്കാൻ അവരുടെ സമഗ്രമായ വിവര ശേഖരണത്തിന് തുടക്കം കുറിച്ചെന്നും അദ്ദേഹം വ്യക്തമാക്കി.