കോവിഡ്-19 ലോകമെമ്പാടുമുള്ള ആക്ടീവ് കേസുകളിൽ ഇന്ത്യ നാലാമത്.

വിവിധ രാജ്യങ്ങളിൽ ഇപ്പോഴും കൊവിഡ് മരണങ്ങൾ ഉയരുകയാണ്. 377,404 പേർക്കാണ് കൊവിഡ് ബാധയിൽ നിലവിൽ ജീവൻ നഷ്ടപ്പെട്ടിരിക്കുന്നത്. ആക്ടീവ് കേസുകളുടെ എണ്ണത്തിൽ നിലവിൽ നാലാമതാണ് ഇന്ത്യ. മെയ് മാസത്തിനുശേഷം ഇന്ത്യയിൽ ദിവസവും റിപ്പോർട്ട് ചെയ്യുന്ന കൊവിഡ് കേസുകൾ ഉയർന്നിരുന്നു. കഴിഞ്ഞദിവസങ്ങളിൽ റെക്കോർഡ് വർധനയാണ് രേഖപ്പെടുത്തിയത്. നിലവിൽ കൊവിഡ് ബാധിതരുടെ എണ്ണത്തിൽ ഏഴാം സ്ഥാനത്താണ് ഇന്ത്യ. 198,370 കൊവിഡ് കേസുകളാണ് രാജ്യത്തുള്ളത്. ഇതിൽ 97,008 പേരും ചികിത്സയിലാണ്. ആക്ടീവ് കേസുകളുടെ എണ്ണത്തിൽ യുഎസ്എ, ബ്രസീൽ, റഷ്യ എന്നിവർ മാത്രമാണ് ഇന്ത്യക്ക് മുന്നിലുള്ളതെന്നതും ശ്രദ്ധേയമാണ്. ഇന്ത്യയിൽ മരണസംഖ്യ 5,608 ആണ്.

ഇന്ത്യയിലെ ആകെ കൊവിഡ് കേസുകൾ രണ്ടു ലക്ഷത്തിലേക്ക് അടുക്കുകയാണ്. മഹാരാഷ്ട്രയും ഡൽഹിയും ഉൾപ്പടെയുള്ള സംസ്ഥാനങ്ങളിൽ രോഗികളുടെ എണ്ണം ഉയരുകയാണ്. മഹാരാഷ്ട്രയിലെ കൊവിഡ് ബാധിതരുടെ എണ്ണം എഴുപതിനായിരം കടന്നിരിക്കുകയാണ്. തിങ്കളാഴ്ച സംസ്ഥാനത്ത് റിപ്പോര്‍ട്ട് ചെയ്തത് 2,361 പുതിയ കേസുകളാണ്. ഇതോടെ സംസ്ഥാനത്തെ കൊവിഡ് കേസുകളുടെ എണ്ണം 70,013 ആയി ഉയര്‍ന്നു. 76 പേരാണ് അസുഖബാധിതരായി മരിച്ചത്. ഇതോടെ മരണസംഖ്യ 2,362 ആയിട്ടുമുണ്ട്.

ലോകം മുഴുവൻ കൊവിഡ് കേസുകൾ ഉയരുന്നത് തുടരുകയാണ്. നിലവിൽ 6365,473 പേർക്കാണ് കൊവിഡ് സ്ഥിരീകരിച്ചിരിക്കുന്നത്. 2,903,418 പേരുടെ അസുഖം ഭേദമായപ്പോൾ 3,084,651 പേർ ഇപ്പോഴും ചികിത്സയിൽ തുടരുകയാണ്. ഇതിൽ 53,402 പേർ ഗുരുതരാവസ്ഥയിലാണെന്നും റിപ്പോർട്ടുകൾ സൂചിപ്പിക്കുന്നു. കൊവിഡ് ബാധിച്ച് ബ്രസീലിൽ മരണപ്പെടുന്നവരുടെ എണ്ണം വളരെയധികമാണ്. അമേരിക്കയ്ക്ക് ശേഷം അഞ്ച് ലക്ഷത്തിലധികം കൊവിഡ് കേസുകൾ (529,405) റിപ്പോർട്ട് ചെയ്ത ഇവിടെ നിലവിൽ 30,046 പേരാണ് മരിച്ചിരിക്കുന്നത്. 24 മണിക്കൂറിനിടെ, ഏഴുന്നൂറിൽ അധികം കൊവിഡ് മരണങ്ങളാണ് റിപ്പോർട്ട് ചെയ്തിരിക്കുന്നത്. രോഗമുക്തരായവരുടെ എണ്ണം 211,080 ആണ്. 288,279 പേരാണ് നിലവിൽ ഇവിടെ ചികിത്സയിലുള്ളത്. ഇതിൽ 8,318 പേര് നില ഗുരുതരമാണെന്നും റിപ്പോർട്ടുകൾ വ്യക്തമാക്കുന്നു.

ലോകത്ത് ഏറ്റവും കൂടുതൽ കൊവിഡ് കേസുകളും മരണങ്ങളും റിപ്പോർട്ട് ചെയ്ത അമേരിക്കയിൽ ആകെ രോഗബാധിതരുടെ എണ്ണം 1859,323 ആണ്. ഇവിടെ 106,925 പേർ മരിക്കുകയും ചെയ്തു. നിലവിൽ 1136982 ആളുകളാണ് അമേരിക്കയിൽ കൊവിഡ് സ്ഥിരീകരിച്ച് ചികിത്സയിൽ കഴിയുന്നത്. ഇതിൽ 16,949 പേരുടെ നില ഗുരുതരമാണ്. 615,416 പേർക്കാണ് ഇവിടെ രോഗമുക്തി ലഭിച്ചിരിക്കുന്നത്. ജോർജ് ഫ്ലോയിഡിന്‍റെ കൊലപാതകവുമായി ബന്ധപ്പെട്ട് അമേരിക്കയിൽ പ്രക്ഷോഭം തുടരുകയാണ്. ഇതിനിടെയാണ് കൊവിഡ് കേസുകളും ഉയരുന്നതെന്നതും അമേരിക്കയ്ക്ക് തലവേദനയാകുന്നതാണ്.