ബെവ് ക്യൂ ആപ്പ് പൊളിഞ്ഞതായി സൂചന, പ്രതികരിക്കാതെ ഉടമകൾ !

മദ്യവിതരണത്തിനുള്ള വരിയിൽ സ്ഥാനം ഉറപ്പിക്കാനുള്ള മൊബൈൽ ആപ്പ് പരാജയമായതോടെ ഉടമകൾ ഓഫീസിൽ നിന്ന് മുങ്ങിയതായി സൂചന. ഇന്ന് എറണാകുളം ഇളങ്കുളം ചെലവന്നൂർ റോഡിലുള്ള ഫെയർകോഡ് ടെക്നോളജീസ് ഓഫീസ് തുറന്നെങ്കിലും ഉടമകളാരും എത്തിയിരുന്നില്ല. ഓഫീസിലെത്തിയ ജീവനക്കാർ മാധ്യമങ്ങളോട് പ്രതികരിക്കാൻ തയ്യാറായതുമില്ല. അതേസമയം ആപ്പ് പരാജയമാണെന്ന് വ്യക്തമായതോടെ അത് ഒഴിവാക്കാൻ ഉന്നതതല ആലോചന നടക്കുന്നു. എക്സൈസ് മന്ത്രി ടി.പി രാമകൃഷ്ണന്‍റെ അധ്യക്ഷതയിൽ ഐടി, എക്സൈസ്, ബെവ്കോ ഉന്നത ഉദ്യോഗസ്ഥർ പങ്കെടുക്കുന്ന യോഗത്തിൽ ഇതുസംബന്ധിച്ച് ഇന്ന് തീരുമാനമുണ്ടാകും.

ആപ്പ് തകരാറിലായതോടെ ഇതുമായി ബന്ധപ്പെട്ട് ഫെയർകോഡ് ടെക്നോളജീസ് ഫേസ്ബുക്കിലിട്ട പോസ്റ്റുകൾ നീക്കം ചെയ്തിട്ടുണ്ട്. മെയ് 16 മുതൽ അവർ ബെവ് ക്യൂ ആപ്പിനെക്കുറിച്ച് നിരവധി പോസ്റ്റുകൾ ഇട്ടിരുന്നു. ആപ്പുമായി ബന്ധപ്പെട്ട് ഉപയോക്താക്കളുടെ സംശയങ്ങൾക്ക് ഫെയർകോഡ് ഫേസ്ബുക്ക് വഴി മറുപടി നൽകിയിരുന്നു. ഇതെല്ലാം ഇപ്പോൾ നീക്കം ചെയ്ത നിലയിലാണ്.

അതേസമയം സംസ്ഥാനത്ത് ആപ്പ് പ്രവർത്തനം മുടക്കിയതോടെ മദ്യവിതരണം പലയിടത്തും പ്രശ്നങ്ങൾ സൃഷ്ടിച്ചു. ചില സ്ഥലങ്ങളിൽ സംഘർഷത്തിലേക്ക് വരെ കാര്യങ്ങളെത്തി. ഇ-ടോക്കൺ ഇല്ലാതെ മദ്യവിതരണം നടത്താനും ചില ബാറുകൾ തയ്യാറായി. കൂടുതൽ സ്ഥലങ്ങളിലും സാമൂഹിക അകലം പാലിക്കുകയും ചെയ്തില്ല. ടോക്കണില്ലാതെ മദ്യവിതരണം നടത്തിയതിന് അങ്കമാലിയിൽ ഒരു ബാറിനെതിരെ എക്സൈസ് ഉദ്യോഗസ്ഥർ നടപടി സ്വീകരിച്ചു. കോട്ടയം ഏറ്റുമാനൂരിലെ ബാറിൽ കൌണ്ടറുകൾ വഴി മദ്യവിതരണം നടത്തി. ഇതോടെ അവിടെ തിക്കുംതിരക്കുമുണ്ടാകുകയും പൊലീസ് ഇടപെട്ട് ആളുകളെ പിന്തിരിപ്പിക്കുകയും ചെയ്തു.

ആപ്പ് പരാജയമായതോടെ ഡെവലപ്പർമാരായ ഫെയർകോഡ് ടെക്നോളജീസിനെതിരെ സമൂഹമാധ്യമങ്ങൾ വഴി രൂക്ഷമായ ആക്രമണമാണ് ഉണ്ടാകുന്നത്. ബെവ് ക്യൂ ആപ്പിനായി പ്ലേസ്റ്റോറിൽ ചെയ്യുമ്പോൾ കൃഷി ആപ്പാണ് ലഭിക്കുന്നതെന്നും, ഗതികെട്ട് അത് ഇൻസ്റ്റാൾ ചെയ്തു നാലു വാഴവെച്ചെന്നുമുള്ള കമന്‍റ് ഫെയർകോഡിന്‍റെ ഫേസ്ബുക്ക് പേജിൽ വൈറലായിട്ടുണ്ട്. വാഴ കുലയ്ക്കുമ്പോഴേക്ക് ആപ്പ് വരുമോയെന്നാണ് ചോദ്യം.