ആദ്യ മത്സരം ആഴ്സണല്-മാഞ്ചസ്റ്റര് സിറ്റി, ഇംഗ്ളീഷ് പ്രീമിയര് ലീഗ് ജൂണ് 17ന് ആരംഭിക്കും.
ഒമ്പത് റൗണ്ടുകള് അവശേഷിക്കുന്നു.
പ്രീമിയര് ലീഗില് മാഞ്ചസ്റ്റര് സിറ്റി, ആഴ്സണല്, ഷെഫീല്ഡ് യുനൈറ്റഡ്-ആസ്റ്റന്വില്ല ക്ലബ്ബുകള് ഒഴികെ എല്ലാവരും 29 റൗണ്ടുകള് പൂര്ത്തിയാക്കി. ജൂണ് പതിനേഴിന് ഇരുപത്തൊമ്പതാം റൗണ്ടില് രണ്ട് ഫിക്സ്ചര് പൂര്ത്തിയാക്കിയതിന് ശേഷം 19ന് മുപ്പതാം റൗണ്ട് ആരംഭിക്കും.
ആരാധകര് വീട്ടിലിരുന്ന് കളി കാണുക.
പ്രീമിയര് ലീഗ് ആരാധകരോട് വീട്ടിലിരുന്ന് കളി കാണാനാണ് ലീഗിന്റെ ചീഫ് എക്സിക്യൂട്ടീവായ റിച്ചാര്ഡ് മാസ്റ്റേഴ്സ് അഭ്യര്ഥിക്കുന്നത്. കൊവിഡ് പ്രതിസന്ധി കാലത്തും പ്രീമിയര് ലീഗ് ആരംഭിക്കുന്നത് വളരെ ആവേശപൂര്വം ലീഗിനെ നെഞ്ചിലേറ്റുന്ന ഫുട്ബോള് ആരാധകരുള്ളതു കൊണ്ടാണെന്നും അവരെ കുറിച്ചോര്‍ത്ത് അഭിമാനിക്കുന്നുവെന്നും റിചാര്‍ഡ് മാസ്റ്റേഴ്സ് പറഞ്ഞു.
ലിവര്‍പൂളിനുള്ള കിരീടം.
മുപ്പത് വര്‍ഷമായി ലിവര്‍പൂള്‍ കാത്തിരിക്കുന്ന കിരീടമാണിത്. 29 മത്സരങ്ങള്‍ ലീഗില് പൂര്‍ത്തിയാക്കിയ ലിവര്‍പൂള്‍ 82 പോയിന്റുമായി ഒന്നാം സ്ഥാനത്ത് നില്‍ക്കുന്നു. രണ്ടാം സ്ഥാനത്തുള്ള മാഞ്ചസ്റ്റര് സിറ്റിക്ക് 57 പോയിന്റ് മാത്രം. 53 പോയിന്റുള്ള ലെസ്റ്റര്‍ സിറ്റി മൂന്നാമതും 48 പോയിന്റുള്ള ചെല്‍സി നാലാമതും 45 പോയിന്റുള്ള മാഞ്ചസ്റ്റര് യുനൈറ്റഡ് അഞ്ചാമതും.
മാര്‍ച്ച് ഒമ്പതിന് അവസാന മത്സരം.
കൊവിഡിനെ തുടര്‍ന്ന് പ്രീമിയര് ലീഗ് നിര്‍ത്തി വെച്ചത് മാര്‍ച്ച് ഒമ്പതിന്. അന്ന് ലെസ്റ്റര്‍ സിറ്റി 4-0ന് ആസ്റ്റന്‍വില്ലയെ പരാജയപ്പെടുത്തി. ആ മത്സരം കഴിഞ്ഞ് നൂറ് ദിവസത്തിന് ശേഷമാണ് പ്രീമിയര് ലീഗില് മറ്റൊരു മത്സരം നടക്കാന്‍ പോകുന്നത്.
ചില മത്സരങ്ങള്‍ ന്യൂട്രല്‍ വേദികളില്‍.
പോലീസ് നിര്‍ദേശ പ്രകാരം പ്രീമിയര് ലീഗിലെ ചില മത്സരങ്ങള്‍ ന്യൂട്രല്‍ വേദികളിലാകും നടക്കുക. ഇതിനെതിരെ ബ്രൈറ്റണ്‍, വെസ്റ്റ്ഹാം, ക്രിസ്റ്റല്‍ പാലസ് ക്ലബ്ബുകള് രംഗത്തെത്തിയിട്ടുണ്ട്.
ആഴ്ചയില്‍ രണ്ട് തവണ പരിശോധന…
പ്രീമിയര് ലീഗ് താരങ്ങള്‍, പരിശീലകര്‍, മറ്റ് സ്റ്റാഫുകള്‍ എന്നിവര്‍ക്കെല്ലാം അതാത് ക്ലബ്ബുകള് ആഴ്ചയില്‍ രണ്ട് തവണ കൊറോണ ടെസ്റ്റ് നടത്തണമെന്നത് നിര്‍ബന്ധമാണ്. പ്രൊജക്ട് റീസ്റ്റാര്‍ട്ട് എന്നതിന്റെ ഭാഗമാണിത്.
