ആരാധകരെ അധിക്ഷേപിച്ചു; ബ്ലാസ്റ്റേഴ്സിനെതിരെ പരാതിയുമായി എഫ്സി ഗോവ
കൊച്ചി: ഐഎസ്എല് ക്ലബ് കേരള ബ്ലാസ്റ്റേഴ്സിനെതിരെ പരാതിയുമായി എഫ്സി ഗോവ. കൊച്ചിയിലെ മത്സരത്തിന് ഒരു വിധത്തിലുമുളള സുരക്ഷ ബ്ലാസ്റ്റേഴ്സ് ഒരുക്കിയില്ലെന്നാണ് ഗോവയുടെ പരാതി. മത്സരത്തിനെത്തിയ സപ്പോര്ട്ട് സ്റ്റാഫിന് നേരേ കല്ലേറുണ്ടായി, എവേ സ്റ്റാന്ഡിൽ ഗോവന് ആരാധകരെ അധിക്ഷേപിച്ചു എന്നും പരാതിയില് പറയുന്നു. സംഭവത്തെ കുറിച്ച് ബ്ലാസ്റ്റേഴ്സ് അന്വേഷിക്കണമെന്നാണ് ഗോവന് ക്ലബിന്റെ പ്രധാന ആവശ്യം.
ഞായറാഴ്ച കൊച്ചിയില് നടന്ന മത്സരത്തില് എഫ്സി ഗോവയെ ഒന്നിനെതിരെ മൂന്ന് ഗോളുകള്ക്ക് കേരള ബ്ലാസ്റ്റേഴ്സ് തോല്പ്പിച്ചതിനു പിന്നാലെയാണ് ഗോവൻ ടീമിന്റെ പരാതി. കേരള ബ്ലാസ്റ്റേഴ്സ് സംഭവത്തിൽ ഇതുവരെ ഔദ്യോഗികമായി പ്രതികരിച്ചിട്ടില്ല. അതേസമയം മത്സരത്തിന് ശേഷം ഗോവന് ഫാന്സിനെ ആശ്ലേഷിച്ച് യാത്രയാക്കുന്ന വീഡിയോ ബ്ലാസ്റ്റേഴ്സ് ആരാധകർ ട്വിറ്ററില് പങ്കുവെച്ചിട്ടുണ്ട്.