സൗഹൃദമത്സരത്തിൽ യുഎഇയെ തകർത്ത് അർജന്റീന

ഫിഫ ലോകകപ്പിന് മുന്നോടിയായുള്ള സൗഹൃദമത്സരത്തിൽ യുഎഇയെ തകർത്ത് അർജൻ്റീന. എതിരില്ലാത്ത അഞ്ച് ഗോളുകൾക്കാണ് അർജൻ്റീനയുടെ ജയം. ഏഞ്ചൽ ഡി മരിയ അർജൻ്റീനയ്ക്കായി ഇരട്ട ഗോൾ നേടിയപ്പോൾ ജൂലിയൻ അൽവാരസ്, ലയണൽ മെസി, ജോക്വിൻ കൊറിയ എന്നിവരാണ് മറ്റ് ഗോൾ സ്കോറർമാർ.

കളിയിലുടനീളം അർജന്റീന തന്നെ നിറഞ്ഞുനിന്നെങ്കിലും ഒറ്റപ്പെട്ട അവസരങ്ങൾ യുഎഇയ്ക്ക് ലഭിച്ചു. എന്നാൽ അതൊന്നും ഗോൾ ആക്കി മാറ്റാൻ യുഎഇ താരങ്ങൾക്കായില്ല. 81ആം മിനിട്ടിൽ ഒരു തകർപ്പൻ മുന്നേറ്റത്തിലൂടെ യുഎഇ ഗോൾ നേടുമെന്ന് തോന്നിച്ചെങ്കിലും അർജന്റീന പ്രതിരോധ താരം ലിസാൻഡ്രോ മാർട്ടിനസിൻ്റെ മിന്നൽ ഗോൾ ലൈൻ ക്ലിയറൻസ് യുഎഇയ്ക്ക് ഗോൾ നിഷേധിച്ചു.