ദേശീയ കായിക അവാർഡുകൾ പ്രഖ്യാപിച്ചു; ശരത് കമലിന് ഖേൽരത്ന
ദേശീയ കായിക അവാർഡുകൾ പ്രഖ്യാപിച്ചു. രാജ്യത്തെ പരമോന്നത കായിക ബഹുമതിയായ മേജർ ധ്യാൻചന്ദ് ഖേൽരത്ന പുരസ്കാരത്തിന് സ്റ്റാർ ടേബിൾ ടെന്നീസ് താരം ശരത് കമൽ അച്ചന്തനെ തെരഞ്ഞെടുത്തു. മലയാളികളായ ബാഡ്മിൻ്റൺ താരം എച്ച്.എസ് പ്രണോയി, അത്ലറ്റ് എൽദോസ് പോൾ എന്നിവർക്ക് അർജുന അവാർഡ് ലഭിച്ചു. നവംബർ 30-ന് രാഷ്ട്രപതി ദ്രൗപതി മുർമു കായിക അവാർഡുകൾ സമ്മാനിക്കും.
ഈ വർഷത്തെ കോമൺവെൽത്ത് ഗെയിംസിലെ പ്രകടന മികവിനാണ് ശരത് കമൽ അച്ചന്ത മേജർ ധ്യാൻചന്ദ് ഖേൽരത്ന പുരസ്കാരത്തിന് അർഹനായത്. മൂന്നു സ്വർണം ഉൾപ്പടെ ഗെയിംസിൽ അദ്ദേഹം നാല് മെഡലുകൾ നേടി. 25 താരങ്ങളെ അർജുന അവാർഡിനും തെരഞ്ഞെടുത്തിട്ടുണ്ട്. ബാഡ്മിന്റൺ താരങ്ങളായ എച്ച്എസ് പ്രണോയ്, ലക്ഷ്യ സെൻ, എൽദോസ് പോൾ, അവിനാഷ് സാബിൾ, ബോക്സർ നിഖത് സരീൻ തുടങ്ങിയ താരങ്ങളും അർജുന അവാർഡിന് അർഹരായി.
സ്പോർട്സ്, ഗെയിംസ് റെഗുലർ വിഭാഗങ്ങളിലെ മികച്ച പരിശീലകർക്കുള്ള ദ്രോണാചാര്യ പുരസ്കാരം ജിവൻജോത് സിംഗ് തേജ (അമ്പെയ്ത്ത്), മുഹമ്മദ് അലി ഖമർ (ബോക്സിംഗ്), സുമ സിദ്ധാർത്ഥ് ഷിരൂർ (പാരാ ഷൂട്ടിംഗ്), സുജീത് മാൻ (ഗുസ്തി) എന്നിവർ നേടി. ഇന്ത്യൻ ക്യാപ്റ്റൻ രോഹിത് ശർമ്മയുടെ പരിശീലകൻ ദിനേശ് ജവഹർ ലാഡിന് ക്രിക്കറ്റിന് നൽകിയ സംഭാവനകൾക്ക് ആജീവനാന്ത വിഭാഗത്തിൽ ദ്രോണാചാര്യ അവാർഡ് ലഭിച്ചു.